Бу легионер футболни тушунмайди, тезлиги ҳам йўқ, тўп узатишни ҳам билмайди!

“Манчестер Юнайтед”нинг афсонавий дарвозабони Петер Шмейхель ҳозирги жамоанинг энг қимматбаҳо ўйинчиларидан бири Антонини кескин танқид қилди.

Собиқ дарвозабоннинг фикрича, бразилялик легионер юқори савияда ўйнашга лойиқ эмас.

- Мен ҳақиқатан ҳам, Эрик тен Хаг Антони масаласини кўриб чиқиш керак, деб ҳисоблайман. Айни пайтда бу футболчи жамоадошларининг ҳам ғашига тегяпти.

Ўтган ўйинда гол уриш учун Антонида жуда кўп вазият бўлди. У на ўзи гол урди ва на жамоадошларига пас берди. У ўйин принципларини умуман тушунмайди, шекилли. Қанот футболчисидан тезкорлик ва жарима майдончаси ичига юқоридан узатиладиган тўплар кутилади. Антонида тезлик йўқ.

Майли у бош мураббий кўрсатмасини бажаряпти, деб қабул қилайлик. Унда бу масалага Эрик тен Хаг жавоб бериши керак, - деи Петер Шмейхель.

Антони “Манчестер Юнайтед”даги охирги голини 2023 йилнинг апрелида урган. Унинг самарасиз ўйинлари серияси 23 та ўйинни ташкил қиляпти. Манчестерликлар бу футболчини 85 миллион фунтга трансфер қилганди.