Бугун бўладиган тўқнашувдан кейин “Барселона” Коутиньони олиб қолиши мумкин

“Бавария”да ижара асосида ўйнаётган Филиппе Коутиньо бугун Чемпионлар лигаси доирасида “Барселона”га қарши майдонга тушиши кутилмоқда.

Футболчининг агенти Киа Журабчан футболчининг келаси мавсумни қаерда ўтказишига доир маълумотларни берди.

- Коутиньо Англия премьер-лигасида ўйнашни истаётганига қарамай, “Барселона”даги фаолият унинг энг юқори чўққиси бўлишда давом этиши мумкин. Буларнинг барчаси Чемпионлар лигаси якунланганидан кейин бир стол атрофида йиғилиб ҳал қилинадиган масалалардир, - деди Журабчан.

“Барселона” юқори маош олувчи Коутиньога асосий таркибдан жой бермади ва футболчи мавсумни Мюнхен клубида ўтказмоқда. Бироқ, “Бавария” ҳам бразилиялик ўйинчини сотиб олишни истамади.

Коутиньога қизиқаётган жамоаларни футболчининг юқори маоши чўчитмоқда. Шунинг учун каталонияликлар футболчидан қутилиш учун унинг маошини бир қисмини тўлаб беришга ҳам рози.