"Бунёдкор" - "Нефтчи" ҳамда "Андижон" - ОКМК учрашувларида юзага келган баҳсли вазиятлар юзасидан эксперт-ҳакамлар хулосаси берилди

Cоcа-Cола Суперлиганинг давом этаётган 23-тури ортда қолган учрашувларида юзага келган бир нечта вазиятлар кўплаб баҳс ва мунозараларга сабаб бўлмоқда. Ушбу тушунмовчиликларга барҳам бериш мақсадида Ўзбекистон футбол ҳакамлари маркази Эксперт-ҳакамлар комиссиясининг навбатдан ташқари йиғилишини ўтказди ва мазкур вазиятлар бўйича экспертлар хулосасини жамлади. Қуйида эътиборингизга мутахассислар хулосасини тақдим этамиз.

1-вазият: “Бунёдкор” – “Нефтчи” баҳси, пенальти борми ёки йўқ? Видеотакрорда гувоҳ бўлганингиздек, меҳмонлар аъзосининг зарбасидан кейин тўп “Бунёдкор” футболчиси Фарҳод Ўткировнинг қўлига теккан. Бироқ қўл табиий ҳолатда, бундан ташқари қўл футболчининг танасига яқин бўлгани учун бу вазиятда ўйинни давом эттиришга рухсат берилган. Қолаверса, бу вазият жарима майдончасининг ичида ёки ташқарисида содир бўлгани борасида аниқ жавоб йўқ, чунки видеотакрорлар орқали буни яққол кўришнинг имкони бўлмади. Эксперт-ҳакамлар комиссияси ҳакамнинг ўйинни давом эттириш ва пеналти белгиламаслик қарорини тўғри деб ҳисоблади.

2-вазият: “Бунёдкор” – “Нефтчи” учрашуви, қизил карточка тўғри берилдими ёки йўқ? Баҳснинг 27-дақиқасида “Нефтчи” аъзоси Диёр Туроповга қизил карточка кўрсатилган. ВАР махсус такрорий лавҳаларидан ҳам кўриш мумкинки, бу вазиятда қўполлик бор. Эксперт-ҳакамлар комиссияси мазкур ҳолатни бош ҳакам Фирдавс Норсафаров яхши позициядан кузатиб турганини ва Диёр Туропов оёғининг таг қисми билан рақиб тиззасига жиддий зарба берганини инобатга олиб, қизил карточка кўрсатиш тўғри қарор бўлган, деб ҳисоблади.

3-вазият: “Андижон” – ОКМК ўйини, пенальти тўғри белгиландими ёки йўқ? Водийдаги баҳснинг 15-дақиқасида ОКМК футболчисининг зарбасидан сўнг дарвозага қараб кетаётган тўп мезбонлар аъзоси Владимир Бубанянинг қўлига тегиб, ўз йўналишини ўзгартирган. Дастлаб, бош ҳакам Аскер Нажафалиев бир нечта футболчилар тўсиб тургани боис вазиятни илғамаган, бироқ ВАР ҳакамлари унга хабар бергач, монитор олдига борган. Такрорларни кўргач эса 11 метрли нуқтага ишора қилиб, Бубаняга сариқ карточка кўрсатган. Эксперт-ҳакамлар комиссияси қўл табиий ҳолатда бўлмагани ва яққол аниқ зарба қайтариб қолинганини ҳисобга олиб, мазкур вазиятда пенальти+сариқ карточка кўрсатилиши тўғри қарор эканини таъкидлади. Шу тариқа, Нажафалиевнинг қарори тўғри деб топилди.

4-вазият: “Андижон” – ОКМК баҳси, тўп қўлга текканми ёки йўқ? Учрашувнинг 66-дақиқасида “Андижон”нинг ҳужуми вақтида жарима майдончаси ичида тўп меҳмонлар аъзоси Виталий Денисовнинг қўлига теккан, деган мазмунидаги хабарлар ижтимоий тармоқларда авж олмоқда. Бош ҳакам бу вазиятда тўп қўлга тегмаган, деб топиб, ўйинни давом эттиришга рухсат берган. Ушбу баҳсларга барҳам бериш мақсадида эътиборингизга вазият акс этган сифатли видеони ҳавола этамиз. Эксперт-ҳакамлар комиссияси ушбу видеога асосланган ҳолда тўп қўл орқали эмас, гавда орқали ўйналганини таъкидлади ва ҳакамнинг қарорини бир овоздан тўғри деб топди.