"Бунёдкор" дуранг учун ўйнадими? Шуҳрат Мақсудов нима дейди?

Coca Cola Суперлига 4-тур доирасидаги "Қўқон-1912" – "Бунёдкор" учрашувидан кейинги матбуот анжуманининг биринчи қисмида "Бунёдкор" устози Шуҳрат Мақсудов иштирок этди.

- Ўйин ҳақида гапиришдан олдин, билишимча, Ойбек Рустамовни бугун таваллуд айёми экан. Ойбекни туғилган куни билан жамоамиз номидан табриклаймиз. Бугунги учрашув биз учун осон бўлмаслигини билардик. "Қўқон-1912" жамоаси ўз майдонида қандай ўйнашини ҳамма билади. Бу жамоа ҳурматга лойиқ. Ўзим ҳам Бахтиёр Ашурматовни яхши биламан, Зоҳид Нурматов иккаласи жамоасини қандай руҳлантиришидан ҳам хабарим бор. Шунинг учун бугун осон бўлмаслигини билардим. Ўйлайманки, ўйин мухлислар учун ёқди. Футболчиларимга ва олис йўл босиб келиб бизни қўллаб турган мухлисларимизга миннатдорчилик билдираман.

Бугунги ўйин осон бўлмаганини айтган ҳолда дуранг натижа биз учун қониқарли бўлди. Лекин бу дуранг учун ўйнади дегани эмас. Бизда ҳам голга тортадиган бир қатор вазиятлар бўлди. Биринчи таймда қулай имкониятлардан фойдалана олмадик.  Биз дуранг учун ўйнамадик.

Иброҳим Томива дисквалификация туфайли бугунги ўйинни ўтказиб юборди. Ҳар бир футболчининг ўз ўрни бор. Битта футболчига боғланиб қолиш керак эмас, деб ҳисоблайман. Бугун ҳужумчиларимиздан қониқиш ҳосил қилдим.

Ҳакамлар хусусида гапирмаган бўлардим. Уларни назорат қиладиган қўмита ўз хулосасини айтгани маъқул, - дейди бош мураббий.