"Бунёдкор" футболчиси дисквалификация қилинди, "Сурхон", "Оқтепа" ва "Арал Самали" мураббийлари жаримага тортилди

Ўзбекистон футбол ассоциацияси тартиб-интизом қўмитасининг навбатдаги йиғилиши бўлиб ўтди. Бу ҳақда ташкилот матбуот хизмати хабар тарқатди.

Суперлига 2-тури доирасидаги “Андижон” – “Сурхон” учрашуви якунланганидан сўнг, икки жамоа футболчилари ўртасида келишмовчилик юзага келган пайтда “Сурхон” клуби бош мураббийи Рифат Акрамхўжаев ўзини нопрофессионал тарзда тутиб, рақиб жамоа мураббийларидан бирини туртиб юборгани учун унга нисбатан жарима интизом чораси қўлланилди.

Шунингдек, ушбу учрашув якунланганидан сўнг, икки жамоа футболчилари ўртасида келишмовчилик юзага келган пайтда “Андижон” жамоаси футболчиси Суннатилло Ҳамиджонов “Сурхон” клуби бош мураббийи Рифат Акрамхўжаевга нисбатан жуда қўпол муносабатда бўлиб, ўзини нопрофессионал тарзда тутгани учун Суннатилло Ҳамиджоновга нисбатан жарима интизом чораси қўлланилди.

Суперлига 3-тури доирасидаги “Бунёдкор” – “Андижон” учрашувининг 36-дақиқасида “Бунёдкор” жамоаси футболчиси Иброҳим Томива Гбадамоси оёғининг таг қисми билан рақиб футболчисининг кўкрак қисмига кучли зарба бергани учун 2 та ўйинга дисквалификация қилинди ва унга жарима интизом чораси қўлланилди.

Про лига 2-тури доирасидаги “Олимпик” – “Оқ-тепа” учрашуви якунланганидан сўнг, “Оқ тепа” клуби маъмури Бахтиёр Иргашев бош ҳакам шаънига номақбул сўзлар ишлатгани учун унга нисбатан 2 та ўйинга дисквалификация қилиш ва жарима интизом чораси қўлланилди.

Шунингдек, мазкур учрашувдан сўнг, “Оқ-тепа” клуби директори Алишер Шоғуломов ҳакамликдан норозилиги бўйича ўйин протоколига ёзма ариза ёзмай туриб, бунинг ўрнига ОАВ орқали ўз норозилигини билдиргани учун жарима интизом чораси қўлланилди.

Про лига 2-тури доирасидаги “Арал Самали” – “Хоразм” учрашуви якунланганидан сўнг, “Арал” жамоаси мухлислари ўз норозилигини қўпол тарзда намойиш этиб, бош ҳакам томон майдонга турли буюмлар улоқтирган. Агар бундай ҳолат яна такрорланса, клуб уй учрашувини мухлисларсиз ўтказиши бўйича огоҳлантирилди. Шунингдек, “Арал Самали” бош мураббийи Тимур Турдиев ҳакамликдан норозилиги бўйича ўйин протоколига ёзма ариза ёзмай туриб, бунинг ўрнига ОАВ орқали ўз норозилигини билдиргани учун жарима интизом чораси қўлланилди.