“Бунёдкор” ва Иван Бошкович ўртасидаги ҳолат ҳал этилди

28-январ куни “Бунёдкор” бош мураббийи Иван Бошкович Лигага мурожаат қилиб, у ва клуб ўртасида 2022-йилнинг 27-декабр куни имзоланган ҳамда қўшимчалар киритилган меҳнат шартномаси бир ой ичида мусобақа ўтказувчи ташкилот томонидан рўйхатдан ўтказилмаганлигини маълум қилганди.

Бу билан “Бунёдкор” футбол клуби “Суперлига ва Про лига регламенти”нинг 12.2-бандини бузган. Шундан келиб чиқиб, Лига ишни ЎФА тегишли қўмитасига оширганди. Мазкур масала бугун бўлиб ўтадиган йиғилишда кўриб чиқилади.

Унга қадар эса клуб ва бош мураббий ўртасида тинчлик келишуви имзоланди. Жараён Лига офисида баёнлаштирилган бўлиб, унга кўра “Бунёдкор” футбол клуби ўзаро шартнома асосида барча молиявий мажбуриятларни бажарди ҳамда Бошкович билан меҳнат шартномасини бекор қилди. Эндиликда “Бунёдкор” ЎФА қўмитасининг қарорини кутиши керак бўлади. Шундан кейин клуб янги бош мураббийни Лига рўйхатидан ўтказиши мумкин.