"Бунёдкор"га ўтишим мен учун жуда ёқимли" ёхуд чемпионга айланган Тошмирзаев нега "Нефтчи"дан кетди?

Куни кеча ЎзПФЛ “Бунёдкор” клуби иқтидорли ўйинчи Билолхон Тошмирзаев билан шартнома тузганини эълон қилди.

2023 йилдан бери “Нефтчи”да тўп сурган ярим ҳимоячи якунига етган мавсумда фарғоналиклар сафида Ўзбекистон чемпионига айланди. У жорий мавсумда “Нефтчи” таркибида Суперлига ҳамда Кубок баҳсларида жами 26 та учрашувда майдонга тушиб, рақиблар дарвозасига 4 та гол урди ҳамда 2 та голли узатмани бажарди. Янги мавсумда эса Билолхон “Бунёдкор” шарафини ҳимоя қилади.

Футболчи “Қалдирғочлар” билан шартнома имзолагач, илк интервьюсини Sports.uz нашрига берди.

- Билолхон, "Бунёдкор"га ўтиш орқали фаолиятингизда янги саҳифа очяпсиз. Аввало, шу ҳақида тўхталиб ўтсангиз.

- “Бунёдкор”га ўтишим мен учун жуда ёқимли. Водийда кўп йил ўйнадим. Энди пойтахт жамоаси билан катта мақсадлар қўйганман. Худо хоҳласа, совринли ўринлар учун курашамиз.

- Сиз бу йил Ўзбекистон чемпиони бўлдингиз. Одатда, чемпион футболчилар жамоасини анча-мунчага ўзгартирмайдилар. Сизни бундай қарорга келишингизга нима жиддий сабаб бўлди?

- Албатта, мен Ўзбекистон чемпиони бўлдим. Орзуимга эришдим. “Нефтчи” жамоасининг шонли тарихига ҳиссамни қўшганимдан жуда хурсандман. У ерда айрим сабаблар бор, уни айта олмайман. Суперлиганинг 3-4 та етакчи клубларидан таклифлар бўлди. Мен эса “Бунёдкор”ни танладим. Аввало, Худо қаерда ризқимни берган бўлса, ўша ерда ўйнайман.

- Адашмасам, "Нефтчи" билан яна бир йиллик шартномангиз бор эди. Буни қандай ҳал қилдинглар ва клуб кетишингизга қандай муносабатда бўлди?

- Шартномам йўқ эди ва 1 декабрь куни тугади.

- Сиз Левченкони кетишини аввалроқ билармидингиз? Балки шу нарса ҳам кетишингизга таъсир қилгандир...

- Менга уни алоқаси йўқ эди. Кетадими-қоладими, мен қарорни олдинроқ қабул қилгандим.

- “Бунёдкор” билан мақсадингиз қандай? Янги мавсумда ҳам яна чемпион бўлишингизга ишонасизми?

- “Бунёдкор” жамоаси ўзбек футболида катта тарихга эга жамоа. Буни айтиб ўтириш шарт эмас. Бу жамоани ҳар доим мақсади бўлган. Худо хоҳласа, совринли ўринлар учун курашамз.

- "Нефтчи"даги бу йилги мавсум ҳақида сўрамоқчиман. Бошида қийин бўлди, ўша пайтда ҳам чемпионликка қанчалик ишонгандингиз?

- Тўғри айтасиз, жуда қийин бўлди. “Нефтчи”да жуда тажрибали футболчилар йиғилди. Бу футболчилар билан чемпион бўлишга ишончим кучли эди. Биз фақат чемпионликни ўйладик ва мақсадимизга етдик. Мухлислар бизни қўллаб-қувватлаб туришди. Уларни алоҳида ҳиссалари бор. Фарғона аҳлига чемпионлик муборак бўлсин.