"Бунёдкор"нинг янги легионери: "Бизда жуда зўр жамоа бор, клубнинг натижаси мен учун энг асосийси"

Кеча сайтимиз орқали хабар бериб ўтганимиздек, “Бунёдкор” клуби янги легионер – Дмитрий Побулич билан шартнома имзолади ва ушбу футболчи янги жамоасининг машғулотларида иштирок этишни бошлади. Бугун ушбу ўйинчи клуб матбуот хизматига ўзининг дастлабки фикрларини билдирди.

- Бу менинг янги жамоамдаги илк машғулотим. Жамоа яхши футболчилардан ташкил топганлиги кўриниб турибди. Бундай клубда ўйнаш имкониятига эга бўлганимдан хурсандман. Бизда жуда зўр жамоа бор ва мен тезроқ ўйинлар бошланишини кутяпман.

Албатта, Ўзбекистонда кўплаб дўстларим, “Сўғдиёна”, “Навбаҳор” каби клубларда тўп суришган. Улар менга “Бунёдкор” Ўзбекистондаги энг кучли клублардан бири эканлиги ҳақида айтиб беришди. Бугун кўрдимки, ҳақиқатан ҳам “Бунёдкор”да шароитлар аъло даражада. Клуб энг зўр стадионга эга, базада ҳам шароитлар жуда яхши. Дўстларимнинг фикри ва футболчиларга яратилган шароитларин кўриб клубга келишга қарор қилдим.

Умид қиламанки, ҳаммаси яхши бўлади. “Бунёдкор”нинг натижаси мен учун энг асосийси ҳисобланади. Мавсумда совринли ўринларни қўлга киритишни ният қилганмиз. Мақсадларимга келсак, жамоамнинг кўплаб ғалабаларига голли узатмаларим билан ҳисса қўшмоқчиман. Чунки майдондаги позициям ҳужумкор ярим ҳимоячи. Бу ерда футбол ўйнаб роҳатланиш ҳамда кўплаб ғалабаларга эришиш учун келдим.

Оғзаки таклифлар бўлди. Аммо аниқ ва жиддий таклиф билан фақат “Бунёдкор” чиқди. Мен шу сабабдан ҳам шу ердаман. Биз сизларни мавсумнинг илк ўйинида стадионда кутиб қоламиз. Биз билан бирга бўлинг, - деди Побулич.