"Бургутлар"нинг октябрдаги парвози ҳақида нималарни биласиз ёхуд "Андижон"да ойнинг энг яхши футболчиси кимга насиб қилди?

Октябрь ойи ҳам про лигада иштирок этаётган “Андижон” жамоаси учун муваффақиятли кечди. Ушбу ойда жамоанинг Суперлига масаласини ҳал қилиши кутилганди ва амалда бу ўз тасдиғини топди.

Виктор Кумиков жамоаси ўтган ойда 4 та учрашув ўтказди. Натижалар қуйидагича: “Андижон” – “Бухоро” – 2:1, “Хоразм” – “Андижон” - 0:1, “Андижон” – “Турон” – 1:1 ва “Андижон” – “Машъал” – 4:2. Гувоҳи бўлганингиздек, “Бургутлар” 4 та беллашувда 3 ғалаба ва 1 дуранг қайд этиб, муддатидан илгари про лига ғолиблиги ва Суперлига йўлланмасини нақд қилиб қўйдилар. Энди жамоа мутлақо хотиржам! Вазифа муваффақиятли бажарилди.

Тўплар нисбатида бу сафар анча сермаҳсуллик кузатилди. Боиси, жамоа октябрь ойида рақиблар дарвозасига 8 та гол уриб, ўз дарвозасидан 4 та тўп олиб чиқди. Умумий ҳисобда “Андижон” биринчи бўлимда 3 та, иккинчи бўлимда 5 та гол урди.

Октябрь ойида киритилган 8 та голлар муаллифи кимлар? Шаҳбоз Эркинов 4 та гол урди. Шунингдек, Илдар Маматказин ўз ҳисобига 2 та гол ёзиб қўйди. Қолаверса, черногориялик легионерлар – Богдан Милич билан Горон Милойко ҳам дарвозани бир мартадан ишғол қилдилар.

“Бобур Арена”да 3 та учрашув ташкил қилинди. “Бухоро”, “Турон” ва “Машъал”га қарши ўйинлар ўтказилди. Хўш, томошабинлар ташрифи қандай? 10 октябрь куни “Бухоро” қабул қилинган баҳсда дисквалификация сабабли ўйин томошабинларсиз ўтди. 24 октябрда “Турон” қабул қилинган учрашувда 3207, “Машъал”га қарши беллашувда эса 3987 ишқибоз стадионда кузатиб борди. Умумий ҳисобда “Андижон” иштирокидаги учрашувларни 7194 нафар мухлис томоша қилди.

Илдар Маматказин, Горон Милойко, Владимир Бубанья, Абдувоҳид Ғуломов нима билан ажралиб турганини биласизми? Тўртта ўйинчи “Андижон” жамоасининг октябрь ойидаги тўртта учрашувида тўлиқ, ўзгаришларсиз иштирок этишди. Шунингдек, октябрь ойида “Андижон” пенальти тепмади ва ўз навбатида клуб дарвозаси томон ҳам пенальти белгиланмади.

Ўтган ойда футболчилар тартиб-интизом масаласида анча яхши таассурот қолдиришди. Иккита ўйинда жамоа аъзолари ҳеч қандай огоҳлантиришсиз ҳаракат қилдилар. Фақат иккита баҳсда 4 нафар футболчига сариқ карточка кўрсатилди. Булар - Суҳроб Бердиев (2 та), Горон Милойко ва Илдар Маматказин. Қизиғи шундаки, 22-тур доирасида “Хоразм” – “Андижон” баҳсида бош мураббий Виктор Кумиковга 90-дақиқада ҳакам қизил карточка кўрсатиб, майдондан четлатди. Натижада Виктор Балютович учта ўйинга дисквалификация қилинди.

Шунингдек, ҳар бир учрашувдан кейин ўйиннинг энг яхши футболчисини аниқлаш бўйича ўтказиб келинаётган овоз бериш жараёнлари октябрь ойида ҳам доимий равишда ўтказилди. Унга кўра, “Андижон”нинг ўтган ойдаги энг яхши ўйинчиси маълум бўлди. Бу жамоа сардори Илдар Маматказин.

Сафарда “Хоразм” жамоаси устидан қозонилган 1:0 кўринишидаги ғалабада айнан ягона гол Маматказиннинг ҳисобига ёзилди. Бундан ташқари, Андижонда “Турон”га қарши кечган баҳсда ҳам Илдар рақиб дарвозасини ишғол қилди. Ҳимоядаги ишончли ўйинлари билан барчада яхши таассурот қолдирди.

Умуман олганда, ушбу футболчи иккинчи маротаба ойнинг энг яхши футболчиси номига сазовор бўлди. Бунга қадар у апрелда ҳам муносиб топилганди. Бу сафарги овоз бериш жараёнларида кураш қизғин кечди. Айниқса, Илдар Мамакатказин билан Шаҳбоз Эркинов бошқалардан анча илгарилаб кетдилар. Якунда “Андижон” сардори ғолиб чиқиш учун 3402 овоз йиғди. Эркинов бўлса, 2798 овоз тўплади. Кучли учликни черногориялик легионер Богдан Милич якунлаб берди. У 839 овоз олди.

Бугунги машғулотдан олдин "Андижон" бош мураббийи Виктор Кумиков октябрь ойининг энг яхши футболчисига аталган махсус статуэткани Илдар Маматказинга топширди.

Шуҳратбек Жўраев.