"Бухоро" - "Бунёдкор" учрашувида ҳар икки жамоадан мураббийлар, футболчилар, матбуот котиби ва бошқалар техник ҳудудга қўйилмайди. Нега?

Бугун “Бухоро” ва “Бунёдкор” жамоалари ўртасида Coca Cola Суперлиганинг 9-туридан қолдирилган ўйин бўлиб ўтади.

Профессионал футбол машғулотлари ҳамда мусобақаларини ташкил қилиш тўғрисида ишлаб чиқилган вақтинчалик санитария-гигиена қоида ва меъёрларининг 4.1 бандига асосан клублар ҳар бир учрашув учун 35 кишидан кўп бўлмаган иштирок этувчилар рўйхатини тақдим этади. “Бухоро” ва “Бунёдкор” ҳам бугунги баҳсда иштирок этувчи футболчи, мураббий ҳамда раҳбариятдан иборат персоналлар рўйхатини тақдим қилди. ЎзПФЛ Комиссияси мазкур рўйхатни ўрганиб чиққач, ҳар икки клуб рўйхатида регламентда кўрсатилганидек зарурий PZR тестини топширмаган айрим шахслар бор экани маълум бўлди.

Жумладан, “Бухоро”нинг бугунги баҳсда иштирок этувчилардан иборат рўйхатига Aлишер Рустамов (бош директор), Aлександр Хомяков (консультант мураббий), Николай Минчев (техник директор), Ҳасан Рўзиев (бош директор ўринбосари сифатида кўрсатилган, аммо ЎзПФЛ рўйхатидан ўтмаган), Aвгустин Кирице (мураббий), Нодир Жўраев (мураббий), Фаррух Мирзааҳмедов (маркетолог), Илҳом Умуров (маъмур), Ойбек Жуманазаров (матбуот котиби), Ражаб Aвезов (Ҳайдовчи) ҳамда Шоҳжаҳон Насимов (футболчи)лар киритилган.

“Бунёдкор”нинг худди шундай рўйхатидан эса Марат Мифтахутдинов (катта мураббий), Родион Саричев (массажчи), Ботир Парпиев (катта маъмур), Aдҳам Aкбаров (ҳайдовчи) ва Aсаджон Aзимжонов (футболчи) ўрин олган.

Регламентга кўра, белгиланган тестларни топшириб, шифокорлардан ижобий хулоса олмаган ҳар қандай шахс ўйин вақтида техник ҳудуддан ўрин олиши, ҳатто жамоа автобусига қўйилиши мумкин эмас. Шу боисдан юқорида исм-фамилияси қайд этилганлар бугунги ўйинда техник зонага қўйилмайди. Улар PZR тести топширганини тасдиқлаб, тест жавобларини ЎзПФЛ Комиссиясига тақдим қилганидан кейингина келаси учрашувлар вақтида техник ҳудудга киришига рухсат берилади, - дейилган ташкилот хабарида.

Фикрлар

Фикр қолдириш учун авторизациядан ўтинг!