"Бунёдкор" футболчиси "Спартак"га ўтди

Костроманинг "Спартак" жамоаси таркиби яна бир легионер билан тўлдирилди. Жамоа матбуот хизмати маълум қилишича, клуб 26 ёшли черногориялик ҳимоячи Марко Бугарин билан шартнома имзолади.

Марко Бугарин профессионал фаолияти давомида Черногория, Сербия ва Ўзбекистон чемпионатларида 200 дан ортиқ ўйин ўтказган. У турли лигаларда тўп суриб, тажрибали ва ишончли ҳимоячи сифатида танилган.

Бугариннинг сўнгги клуби Тошкентнинг "Бунёдкор" жамоаси бўлди. У ерда футболчи 41 та учрашувда майдонга тушиб, 2 та гол урди ва яна 2 та голли узатма муаллифига айланди. Черногориялик футболчи бундан олдин Сербиянинг "Спартак" (Суботица), "Младость" (Нови-Сад), шунингдек, Черногориянинг "Единство", "Морнар", "Бокель" ва "Игало" клубларида ҳам ўйнаган.