Чайналган "баклажка"дан чемпионликкача! "Интер" босиб ўтган йўл сизни ҳайрон қолдиради!

SPORTS.uz Италия А Серияси ғолиблигини қўлга киритган «Интер»ни табриклайди ва бу ғалабага қадар жамоа босиб ўтган йўл борасида фикр юритади.

2014 йилнинг 27 март санасида «Интер» ўз уйида «Удинезе» билан тўқнаш келди. Ўйин давомида клубнинг ўша даврдаги бош мураббийи - Вальтер Мадзарри сув солинган идишни тишлаб тургани кадрга тушиб қолди. Қарабсизки, 2-3 соатдан кейин, у интернет юлдузи!

нфрш

Бу кадр инсонларнинг юзида табассум уйғотиши мумкин, лекин жамоа мухлислари учун оғир кунларни эслатиб турувчи хотира сифатида тарихда абадий қолади. Италияда клубни «ақлсиз Интер» деб аташади. Бу ҳеч қандай ҳақорат эмас. Итальянлар учун Ахиллес ёки Одиссей сингари таниқли Пазза атамаси «Интер»га нисбатан қўлланилади. Клуб мухлислари ҳам ўз мадҳияларида «Ақлсиз «Интер»ни севиш керак» иборасидан фойдаланган. Келинг, воқеалар ривожидан илдамлаб кетмаймиз.
Массимо Моратти ажойиб президент. 80-90 йиллар оралиғида у ўз замонасининг энг олди раҳбарларидан эди. Янги аср бошлангач, ўзгаришлардан чўчигани учун қолганлардан ортда қолишни бошлади. Қаҳрамонимиз, футбол клубини эркатой аёлга қиёслар, ўзи ҳам жамоа билан шундай йўл тутар эди. Ортиқча сарф харажатлардан чарчамаган Моратти жуда кўп хатоларни амалга оширган бўлсада, темпни тушириб юборгани йўқ.

Нефть бизнесидан келиб тушаётган пулларни «Интер»га сарфлашда давом этди, бироқ йиллар ўтгани сари футбол қимматлашиб борди. Оилавий бизнес банкротга учрагач, янги аср бошида Моратти клубни молиялаштиришда муаммоларга дуч келишни бошлади. Оқибатда, жамоа тезда қарзга ботиб кетди. Натижада, Моратти вазиятдан кичик талофат билан чиқиб кетишга қарор қилди. У клуб суяги саналган қария юлдузларга суянишдан бош тортди.

Моратти клуб етакчилари пик формага кўтарилганда, уларни сотиб юборишни истамас эди. Орадан 2-3 йил ўтгач, уларни арзимаган сумма эвазига қўйиб юборишга мажбур бўлиши одат тусига кирди. Бу формула давом этгач, натижалар ҳам кескин пасайиб кетди.

Жамоанинг янги эгаси - Эрик Тохир футбол билан у қадар қизиқмагани рост. Шунга қарамай, у ишни тўғри йўлга қўйди. Катта ваъдалар бериб ташламади, атрофига ўз дўстларини йиғиб олмади. У «Интер»даги барча менежерларни ўз вазифасида олиб қолди. Бу қарор якунда ўзини оқламади. «Нерадззури» ҳар мавсумда ўртамиёна футболчилардан ташкил топган жамоа билан чемпионлик учун кураш олиб боришни бошлади. Келажаги порлоқ ёшлар эса, кучлироқ саналган «Юве» ёки «Наполи» сингари клубларга интилди.

2010 йилда амалга оширилган трансфер компанияси ёдингиздами? Атиги 40 миллион евро эвазига, миланликлар Ишак Бельфодил, Силвестре, Сафир Тайдер ва Диего Лаксалтни сафга қўшиб олди! Бундан ташқари, клуб ҳар йили ўртамиёна футболчилар учун керагидан ортиқ маош тўлар, 10 яқин ижрочилар ижара асосида бошқа клуб шарафини ҳимоя қила бошлади. Бу клуб бюджетига улкан зарар келтириши турган гап.

Баъзан трансферлар мухлисларни ҳайрон қолдирган. «Болонья»дан сотиб олиш шарти билан ижарага олинган 30 ёшли Мудингайи ёдингиздами?! У «Интер»дан сўнг, тўғри Б Серияга йўл олган. Қуйи лигаларда 9 ўйин ўтказгач, бутсаларини михга илиб юборган футболчининг трансфери ҳам «Интер»ни қанчалар нотўғри йўлдан борганини кўрсатиб турибди. Ёки Жонатанни эслай оласизми? 2011 йилда бразилиялик ҳимоячи учун жамоа 5 миллион евродан воз кечган. Тактик жиҳатдан уқувсиз бўлгани учун ўйиндан тушиб қоладиган футболчи учун бирорта жамоа пул тўлагани йўқ. У фаолиятининг сўнггига қадар эркин агент мақомида жамоасини алмаштирди.

Тўғри, яхши трансферлар ҳам бўлди. 19 ёшли Матео Ковачич ёки Филиппе Коутиньо жамоа либосини кийди, лекин тажрибали ўртамиёналар орасида ёшлар йўқ бўлиб кетишни бошлади. Шу боис, қора кунлар бошдан ўтаётган пайтда, ёшлар катта саҳнага чиққани йўқ.

нфошс24

Кейинроқ, Тохир постни топширди. Бадавлат хитойликлар пулни аяб ўтиргани йўқ, лекин уни тўғри ишлатдими? Бу саволга аниқ жавоб бериш мушкул. Габриел Барбоза ва Жоау Мариу учунгина 80 миллион еврони харж қилиб юборган раҳбарлар ўртакаш агентлар хизматидан фойдаланганини кечроқ англаб етди. Киа Джурабчиан жамоа раҳбарларини каттагина сумма эвазига омадсиз трансферларни амалга оширишга кўндира олгани эътиборга молик. Барбоза ва Мариу фонида «Арсенал»нинг Николья Пепега сарфлаган 80 миллион евроси кўринмай ҳам кетади! Улар биргаликда жамоа учун 4 гол киритди холос.

Жамоа кризис ҳолатига тушиб қолгач, Роберто Манчини таклиф этилди. Ҳатто у ҳам вазиятни юмшатишга ожизлик қилди. Роберто яхши бошлаган бўлса-да, якунда 4-поғонани забт этди. У пайтлари Италияда фақат 3 клуб ЕЧЛ йўлланмасига эга чиқар эди. Ёзда эса, мавсумолди машғулотлар чоғида жамоани тарк этди. Унинг ўрнини эгаллаган Франк Де Бур мураббий амалга ошириши мумкин бўлган барча омадсиз қарорларни қабул қилишга улгурди.

Лучано Спалетти келгач, бироз тартиб ўрнатилгандек бўлди. Мутахассис комбинацион футболга асосланган жамоа қурди. Шу тариқа, олдинда  Перишич, Кандрева ва Икарди учлиги ҳосил бўлди. Ҳаммаси кўнгилдагидек кетишни бошлаган бир пайтда, жамоа сардори - Мауро Икардида муаммолар пайдо бўлди. У ўз турмуш ўртоғини агентига айлантиргач, ички муҳит бузилиб кетди. Ванда Нара жамоа ҳақидаги турли гап-сўзларни телеэкран орқали бутун Италияга ошкор қилишни бошлаб юборди. Ҳатто, турмуш ўртоғининг янги шартномаси борасида миш-мишларни ҳам турли ток-шоуларда эълон қилишдан уялмади.

«Интер» Икардидан аламли бўлса-да қутулди. Айнан шу паллада «Ювентус»даги энг муҳим фигура - Жузеппе Моратта истеъфога чиқарилди. Турин клуби бош директори Роналдунинг трансферига охиригача қарши чиқди. Якунда, португалиялик Италияга кўчиб ўтди. Моратта эса, ишсиз қолди. Кўп ўтмай, пул билан муаммоси йўқ «Интер»дан унга таклиф келиб тушди. Иш тўғри йўлга қўйилса, «Юве»га аламли зарба бериш мумкинлигини пайқаган Моратта дарров «Интер»га равона бўлди.

Қаҳрамонимиз Миланга кўчиб ўтгач, жамоа мухлислари юрак хуружини бошидан ўтказди. Етакчилардан саналган Перишич ва Икарди клубдан «ҳайдаб юборилди». Жузеппе ҳеч бир футболчининг мавқейи клубда мураббийиникидан баланд бўлмаслиги учун охиргача курашди. У ҳатто, бу принцип йўлида мураббийларни ишдан олишгача борди.

Эътиборлиси шундаки, Моратта биргина истеъфолар билан чекланмади. У захира ўриндиғидаги жанжалкаш футболчилар ўрнини ёш ва футболга чанқоқ ёшлар билан тўлдириб борди. Қисқа қилиб айтганда, клуб манфаатларини ўзиникидан баланд қўядиган футболчи жамоада қолмади. Бу орада «Реал» Мадриднинг жисмоний тайёргарлигига жавоб берувчи мутахассисни клубга олиб келди. Шунингдек, «Интер» фахрийси - Габриел Ориали билан шартнома имзоланди. Ҳаммасини ўз ўрнига қўйгач, ҳал қилувчи зарбани берди! Барча қусурлардан қутилгач, янги жамоа тузиш учун Антонио Конте Миланга учиб келди.

Тан олиш лозим, Конте келиши билан барчаси ишга тушиб кетгани йўқ. Конте илк кунларданоқ, «Ювентус» билан ўртада фарқ катталиги ҳақида фикр билдиришдан тўхтамади. Шу боис, Моратта у истаган даражадаги форвард - Ромелу Лукакуни сотиб олди. Шунга қарамай, натижалар қониқарли бўлгани йўқ. Қишда эса, Конте истаган Артуро Видаль ўрнига Кристиан Эриксен харид қилинди. Афсуски, мутахассис жамоага бош эмас, мотор бўладиган ижрочи қидираётган эди.

«Интер» чемпионатда иккинчи поғонани эгаллади ва Европа Лигасида яхши иштирок этди. Бу узоқ йиллик омадсизликдан чарчаган мухлислар учун умид бағишлагани рост. Шунга қарамай, бу мавсумдан Конте умуман қониқмади. Антонио жамоа билан хайрлашмоқчи эканлигини ҳар бир матбуот анжуманида такрорлади. Баъзи учрашувларга ҳатто ўз адвокати билан ташриф буюрди. У исталган пайтда жамоа билан тузилган шартнома бекор қилиниши мумкинлигига шама қилган бўлса, ажаб эмас.

Конте «Челси» ва «Ювентус»даги илк мавсумидаёқ чемпионликни қўлга киритган. Ваҳоланки, ўша жамоаларда чемпионлик таъмини тотиб кўрган йигитлар мавжуд эди. Дел Пьеро, Пирло, Буффон... «Челси» эса, Конте келишидан бир йил аввал чемпионлик тахтига кўтарилган эди. «Интер» эса улардан кескин фарқ қилади. Жамоа аъзоларининг 65 фоизи фаолияти давомида бирорта кучли чемпионат олтин медалларига эга эмас эди.

Европа Лигаси финали сўзимизга исбот бўла олади. Мутахассис ўз жамоаси «Севилья»дан кучли эканлигини исботлади, лекин натижа испанлар фойдасига ишлади. Орадан бир йилга яқин вақт ўтди. Миланликлар чемпионат якунланишига 4 тур олганида 82 очко билан олтин медалларга эга чиқди. Трансферлар кўп бўлмаганига қарамай, таркиб деярли 100 фоиз ўзгарди. Бастони асосий таркибга суқилиб кирди. Перишич ва Дармиан ўртасида рақобат пайдо бўлди. Ҳакими эса ўнг қанотда якка ҳукмрон. Агар 2 йил аввалги «Интер»нинг ҳимоясини ёдга олсак, прогресс дарров кўзга ташланади.

Аввалги «Интер»дан биргина Самир Ханданович қолди холос. Қолган барча Контенинг янги ўйин услубида ўзини кўрсатди. Бугунги кунда Конте тарғиб этаётган ўйин фалсафаси «кўк-қора»ларга жуда мос. Улар ўз фишкаси билан қолганлардан ажралиб туради. Тўғри, мутахассис жамоани супер даражага кўтаргани йўқ, лекин бошқалар уддалай олмаган бир ишни амалга оширди. У «Интер»ни стабил ғалаба қозонишга ўргатди. Айрим учрашувларни жуда ёмон ўтказиб ҳам якунда 3 очко ишлаб олиш мумкинлигини исботлади.

нфрш

Ҳозирги натижа Конте учун бошланиши холос. Футболчилар учун эса, умуман акси. Самир Ханданович, Раноккио, Д'амброзио ўз фаолиятидаги илк олтин медалга эга чиқди. Кўп ўтмай, улар Конте қуриши мумкин бўлган янги жамоанинг устунларига айланади. Шунга қарамай, Антонио Конте яна машғулотларда адвокати билан телефонда суҳбатлашишни бошлади. Унинг мавсум сўнгида кетиши мумкинлиги ҳақида миш-мишлар юрганидан хабардорсиз. Бу италиялик коач учун одатий хол. Шунга қарамай, бир нарса аниқ: «Интер» - Италия чемпиони! Бу тарихда қолди. Қолганини омон бўлсак, кўраверамиз!

Фикрлар

Фикр қолдириш учун авторизациядан ўтинг!
&
Abdushukurov O
04/05/2021 17:24
Ha... Omon qolsangiz ko'raverasiz...☺