“Челси” клуб ичидаги сотқинни фош қилди

“Челси” бош мураббийи Лиам Росеньор жамоа таркиби ҳақидаги маълумотларни сизиб чиқиши манбаси аниқланганини билдирди.

Франция матбуоти ўтган ҳафта Чемпионлар лигаси 1/8 финалида ПСЖга қарши биринчи ўйиндан бир неча соат олдин “Челси”нинг асосий таркибини аниқ эълон қилган эди.

Жавоб ўйини олдидан ҳам деярли шу ҳолат такрорланди, чунки матбуотга Весле Фофананинг соғлиғида муаммо борлиги ва марказий ҳимояда Трево Чалоба ҳамда Йоррел Хато ўйнаши маълум бўлганди.

Натижада “Челси” маълумотни ким тарқатаётганини аниқлади, ва Daily Mail нашрининг  маълум қилишича, бу ўйинчи эмас.

- Биз хабар сиздираётган ким эканини биламиз. Бу менга ёки жамоага қарши ёмон ният билан қилинмаган. Биз манбани аниқладик ва вазиятни ҳал қилдик, - деди Лиам Росеньор.