“Челси” зўрға олган футболчисидан осонгина қутилмоқчи

“Челси” раҳбарияти ўтган ёзда бир неча клуб  билан рақобатда ғолиб чиқиб, ўз таркибига қўшиб олган Ҳаким Зиешдан тезроқ қутилишга қарор қилди. “Аякс”дан олиб келинган марокашлик футболчи мавсум якунланиши билан сотиб юборилади.

Лондон клуби футболчиларга тўланаётган маошлар миқдорини камайтириш мақсадида ёзда бир неча ўйинчилардан воз кечадиган бўлди. Ҳаким Зиеш билан бирга жамоани ўтган мавсумда порлаган ҳужумчи Тэмми Абрахам ва франциялик ярим ҳимоячи Тьемуэ Бакайоко ҳам тарк этиши керак.

Зиешнинг “Челси” билан шартномаси 2025 йилнинг 30 июнигача давом этади. Жорий мавсумда марокашлик ярим ҳимоячи 29 та учрашувда тўртта гол уриб, жамоадошларига тўртта голли пас узатди. 

Зиёш Нидерландияда “Херенвен”, “Твенте” ва “Аякс” шарафини ҳимоя қилган. Марокаш терма жамоаси сафида 35 та учрашувда рақиблар дарвозасига 17 та гол урган.