“ЖЧ-2026”: Ўзбекистон гуруҳида тарихий рекорд қайд этилади

Ўзбекистон миллий терма жамоасининг жаҳон чемпионати гуруҳ босқичидаги рақибларидан Португалия миллий терма жамоаси мусобақада иштирок этадиган футболчиларнинг якуний рўйхатини эълон қилди.

Бош мураббий Роберто Мартинес Шимолий Американинг уч мамлакати мезбонлик қиладиган мундиалга қуйидаги таркибни олиб боради.

Дарвозабонлар: Диогу Кошта (“Порту”), Жозе Са (“Вулверхэмптон Уондерерс”), Руй Силва (“Спортинг” Лиссабон), Рикарду Велью (“Генчлербирлиги”).

Ҳимоячилар: Рубен Диаш (“Манчестер Сити”), Жоау Канселу (“Барселона”), Диогу Далот (“Манчестер Юнайтед”), Нуну Мендеш (“Пари Сен-Жермен”), Нелсон Семеду (“Фенербаҳче”), Матеуш Нуньеш (“Манчестер Сити”), Гонсалу Инасиу (“Спортинг” Лиссабон), Ренату Вейга (“Вильярреал”), Томаш Араужу (“Бенфика”).

Ярим ҳимоячилар: Бруну Фернандеш (“Манчестер Юнайтед”), Бернарду Силва (“Манчестер Сити”), Витинья (ПСЖ), Жоау Невеш (ПСЖ), Рубен Невеш (“Ал-Ҳилол”), Саму Кошта (“Мальорка”).

Ҳужумчилар: Криштиану Роналду (“Ан-Наср”), Рафаэл Леау (“Милан”), Жоау Феликс (“Ан-Наср”), Гонсалу Рамуш (ПСЖ), Педру Нету (“Челси”), Франсишку Консейсау (“Ювентус”), Гонсалу Гедеш (“Реал Сосьедад”), Франсишку Тринкан (“Спортинг” Лиссабон).

Криштиану Роналду Португалия терма жамоаси таркибига киритилганидан кейин ўзининг рекорд даражадаги олтинчи жаҳон чемпионатида иштирок этадиган бўлди. Ҳали жаҳон футболида ҳеч ким олти марта жаҳон чемпионатида қатнашмаган.

The Independent нашрининг ёзишича, Мартинес 41 ёшли Роналду ва яна 26 нафар футболчини Португалия учун илк жаҳон чемпионлиги соврини қўлга киритиш мақсадида танлади. Кенг тарқалган тахминларга кўра, ушбу турнир Роналду учун футболдаги энг нуфузли совринни ютишга бўлган сўнгги уриниш, шунингдек, Саудия Арабистонига кетганидан кейинги илк жаҳон чемпионати бўлади.

Криштиану Роналдудан ташқари, унинг кўп йиллик рақиби Лионель Месси олтита жаҳон чемпионатида иштирок этган икки футболчидан бирига айланиши кутилмоқда. Месси Роналдудан фарқли равишда 2022 йилги жаҳон чемпионатида ғолиб бўлган.

2003 йилдан бери Португалия терма жамоаси шарафини ҳимоя қилиб келаётган Роналду халқаро миқёсда улкан рекорд соҳиби ҳисобланади. 41 ёшли юлдуз миллий терма жамоалари орасида энг кўп ўйин (226) ва энг кўп гол (143) уриш бўйича рекорд ўрнатган. Бундан ташқари Роналду бешта жаҳон чемпионатида гол урган ягона футболчидир.

Португалия мундиалнинг “K” гуруҳидан жой олган бўлиб, унда Колумбия, Ўзбекистон ва Конго Демократик Республикаси футболчиларига қарши баҳс олиб боради. Жамоа Америка вақти билан 17 июнь куни Хьюстон шаҳрида Конгога қарши ўйин билан турнирдаги иштирокини бошлайди. Иккинчи турда европаликлар Ўзбекистон миллий терма жамоасига тўқнаш келади.

Криштиану Роналду Ўзбекистон миллий терма жамоалари орасида Элдор Шомуродов ва Жалолиддин Машариповни яхши танийди. Португалиялик юлдуз Шомуродов билан Италия чемпионатида бир бирига қарши ўйнаган. Жалолиддин Машарипов эса. “Ан-Наср”да фаолият юритган даврда жамоа янги келган Роналдуга ўзининг 7-рақамини бўшатиб берган эди.

Ҳусановдан ташқари яна бир ўзбек футболчиси Европа Чемпионлар лигасида қатнашади

Ҳусанов йил футболчиси бўлиш имконияти қандай баҳоланмоқда?

Ширер Ҳусановни ҳимоя қилиб чиқди, унга Жеррард қўшилди!

Ҳусанов Рамазонда мени ҳайратга солган!

“Сити”ни биринчи ўринга кўтаришга ҳисса қўшган Ҳусановнинг ўйини қандай баҳоланди?