Chirchiqda voleybol bo‘yicha ichki ishlar vaziri kubogining shahar bosqichi bo‘lib o‘tdi

Xabaringiz bor, ayni paytda joylarda sportning voleybol turi bo‘yicha Ichki ishlar vaziri kubogining hududiy bosqich bellashuvlari o‘tkazilmoqda. Xususan, kecha 14 iyul kuni O‘zbekiston davlat jismoniy tarbiya va sport universiteti manejida ham voleybol bo‘yicha Ichki ishlar vaziri kubogining Chirchiq shahar bosqichi musobaqasi bo‘lib o‘tdi.

Mazkur musobaqada Chirchiqdagi mavjud 44 ta mahallalardan 17 yoshgacha bo‘lgan 120 nafar o‘g‘il bolalar va qizlar ishtirok etishdi.
Musobaqaning ochilish marosimida so‘z olgan Chirchiq shahar IIB boshlig‘i, podpolkovnik Elmurod Sultonov barcha yig‘ilganlarni tabriklab, sportchilarga omad tiladi. Shuningdek, ochilish marosimida Chirchiq shahar hokimi Davron Hidoyatov, Toshkent viloyati ichki ishlar bosh boshqarmasi boshlig‘i o‘rinbosari, polkovnik Ziyod Iminov, O‘zbekiston davlat jismoniy tarbiya va sport universitetining yoshlar masalalari va ma’naviy-ma’rifiy ishlar bo‘yicha birinchi prorektori Sherzod Mirzanov, O‘zDJTSU professor-o‘qituvchilari, Chirchiq shahar sport maktabi trenerlari ishtirok etishdi.

Murosasiz va qizg‘in bellashuvlarning yakuniy natijalariga ko‘ra, o‘g‘il bolalar o‘rtasida faxrli birinchi o‘rinni "Iqbol" MFY jamoasi, ikkinchi o‘rinni "Ishonch" MFY va uchinchi o‘rinni "Humo" MFY jamoalari qo‘lga kiritdi.
Qizlar o‘rtasida faxrli birinchi o‘rinni "Sharq" MFY jamoasi egallagan bo‘lishsa, ikkinchi o‘rin "Ishonch" MFY jamoasiga va uchinchi o‘rin "Yoshlik" MFY jamoasiga nasib etdi.
G‘olib va sovrindorlar diplom medal, kubok va qimmatbaho esdalik sovg‘alari bilan mukofotlanishdi.
Musobaqa reglamentiga muvofiq, ushbu bosqichda g‘olib bo‘lgan jamoalar endi viloyat bosqichida ishtirok etishadi.