"Сити", "Арсенал", "Челси"да порлаган юлдуз қамалиб кетиши мумкин

Машҳур ҳужумчи Рахим Стерлингга нисбатан Англияда жиноий иш қўзғатилди. Унга маст ҳолда автомашина бошқаргани учун икки йилгача озодликдан маҳрум этиш жазоси қўлланилиши мумкин.

Буюк Британия оммавий ахборот воситалари, жумладан The Sun нашри ёзишича, Стерлингга хавфли ҳайдаш, ноқонун моддалар сақлаш ва ушланганидан сўнг тиббий таҳлил топширишдан бош тортиш каби  бир нечта модда бўйича айб қўйилган. 

Ҳодиса май ойи охирида Англиянинг жанубида содир бўлган. Полиция маълумотларига кўра, 31 ёшли футболчи бошқарувидаги Lamborghini автомагистральдаги тўсиққа бориб урилган. У маст ҳолда ҳайдаш ва ноқонуний моддалар сақлашда гумонланиб, қўлга олинган. Кейинчалик Стерлинг тергов якунлангунча кафолат остида қўйиб юборилган.

Тергов натижаларига кўра, энди футболчи 15 сентябрь куни Бейзингсток магистратлар суди олдида жавоб беради.

Рахим Стерлинг ҳозирда эркин агент мақомига эга. Унинг сўнгги клуби Нидерландиянинг “Фейенорд” жамоаси бўлган. У ўз вақтида “Ливерпуль” тарбияланувчиси сифатида катта футболга кириб келган, кейинчалик “Челси”, “Манчестер Сити” ва “Арсенал” таркибида ҳам майдонга тушган.

“Манчестер Сити” сафида Стерлинг тўрт марта Англия премьер-лигаси чемпиони бўлган. Англия миллий жамоаси учун эса 82 ўйин ўтказиб, 20 та гол урган. У ватан жамоаси билан бирга Европа чемпионати – 2020 мусобақасида финалгача етиб борган.