Дания терма жамоаси Эриксеннинг аҳволи ҳақида расмий маълумот берди

Дания ва Украина терма жамоалари ўртасидаги ўртоқлик учрашуви Кристиан Эриксеннинг ҳушидан кетиши сабабли расман бекор қилинди.

Учрашувнинг 65-дақиқасида, ҳисоб 2:1 кўринишида данияликлар фойдасига бўлиб турган пайтда, Германиянинг "Вольфсбург" клубида тўп сураётган 34 ёшли футболчи майдонга қулаб тушди ва ҳаракатсиз қолди.

Орадан кўп ўтмай Дания терма жамоаси матбуот хизмати Эриксеннинг ҳушига келганини маълум қилди. Шунингдек, футболчи майдонни мустақил равишда тарк этгани қайд этилди. Бироқ Оденсе шаҳрида ўтаётган баҳсни давом эттирмасликка қарор қилинди.

Эслатиб ўтамиз, бу Кристиан Эриксен фаолиятидаги биринчи бундай ҳолат эмас. У 2021 йил 12 июнь куни Копенгагендаги "Паркен" стадионида бўлиб ўтган "Евро-2020" доирасидаги Дания — Финляндия учрашувида юраги тўхтаб қолган эди.

Кейинчалик футболчига махсус кардиостимулятор ўрнатилган ва у профессионал фаолиятини давом эттиришга муваффақ бўлган.