Даврон Файзиев: "Мураббий майдонга чиқиб гол уриб бериши қоляпти холос, унда футболчиларни тўп суришига ҳам ҳожат қолмайди"

“Қўқон-1912” клуби Даврон Файзиев бош мураббийлиги остида иккинчи ўйинини ўтказди. Ўтган турда водий дербисида “Нефтчи” билан жанговар 3:3 ҳисоби кузатилганди. Бу сафар меҳмонда “Олимпик” билан 1:1 ҳисобида дуранг қайд этилди. Ўйиндан сўнг қўқонликлар устози Даврон Файзиев фикрлари билан ўртоқлашди.

- Ўйиндан олдин “Пахтакор-79” хотирасини хотирлаб яхши кайфиятда учрашувни бошладик. Ўйинга баҳони мухлислар беришади. Яхши тайёргарлик олиб бордик. “Олимпик”ни бир нечта беллашувларни кўриб чиқиб, таҳлил қилдик. Майдонда иккинчи рақам бўлиб ўйнашни ният қилмагандик. Фақат ҳисобга қараб ҳаракатимизни озроқ ўзгартирдик. Керакли жойда учта ҳужумчи, қачонки, “Олимпик” катта куч билан ҳужумга ўтганида бешта ҳимоячи билан ҳам ўйнашга ўтдик. Йигитларга ҳеч қачон эътирозим йўқ. Берилган кўрсатмаларни бажаришди. Фақат имкониятдан тўлиқ фойдаланишимиз қийин бўляпти. Лекин ўйинчиларимизда биринчи даврадаги каби голдан кейин тушкунлик аломатлари йўқ. Шуниси қувонарли. Охиригача курашда давом этишяпти. Умумий маънода олиб қарайдиган бўлсак, бизда вазиятлар кўпроқ бўлди. Футболда кимдир хато қилади, бу хатодан кимдир фойдаланади. Жамоамизга биргина ғалаба етишмай турибди. Футболчилар машғулотларда яхши ишлашяпти.

- Жамоа иккинчи бўлимда кўпроқ ҳимояга “ётди”. Қарши ҳужумда кўплаб имкониятлар бўлди. Биринчи бўлимда ҳам яккама-якка вазиятлардан фойдалана олмаяпти. Жамоага нима етишмаяпти?

- Бизга раҳбарият ёки бошқа жойдан ҳеч қандай босим бўлаётгани йўқ. Фақат турнир жадвалидан келиб чиққан ҳолда балки бош мураббий сифатида мен босим қилаётган бўлишим мумкин. Ёки озроқ ҳаяжон бордир. Аммо ҳамма футболчимизда тажриба бор. Мураббий кўрсатмани беради ва талаб қилади. Майдонда ўйинчи бажаради. Битта гол эмас, камида тўртта гол уришимиз мумкин эди. Бугунги ўйинда охирги пас ва якунловчи зарба етишмади. Энди мураббий чиқиб гол уриб бериши қоляпти, холос. Агар “Қўқон-1912” ёки “Олимпик” мураббийи майдонга чиқиб гол урса, унда футболчиларни тўп суришига ҳам хожат қолмайди (кулади). Ҳамма жойда хато бор. Иш бор жойда хато бўлади. Танқидни тўғри қабул қилишимиз керак ва хатоларни қайтармаслик керак. “Олимпик” катта куч билан олдинга ташланишини билардик. Қаердадир 10-15 дақиқа қарши ҳужумда, яна керакли жойда прессингда ўйнадик. Бу ўйин давомида кўриниб турди. Қаердадир таваккалчиликка ҳам қўл уришга тўғри келди. Яна қаердадир ўйин бошидаги кўрсатмаларга ҳам қайтишга тўғри келди. Бугун иккала жамоага ҳам бир очкодан насиб қилган экан. Аммо чиройли футбол бўлди.

- Биринчи даврада клубда яхшигина молиявий муаммолар бор эди. Ҳозир бунинг маълум қисми бартараф этилдими? Ҳолат қандай?

- Биринчи даврада бор эди. Иккинчи давра бошланди. Молиявий томонлама катта қарздорлик йўқ, қисман бор. Биринчи давра билан солиштирганда 70-80 фоизга қопланди. Барча клубда ҳам бундай муаммолар учраб туради. Сабр қилиш керак. Футбол касбини танлаганмиз, сабрли бўлишимиз лозим. Клуб имкониятини ҳам тўғри тушуниш керак. Шунинг учун ҳеч қайси футболчини чиқиб бизда шунақа муаммо бор деб айтишга ҳаққи йўқ. Бу ўзимизнинг ички муаммоимиз бўлган ва бу ёпилди, аста-секин изига тушяпти. Битта ютуққа эришсак, ўйлайманки, ўйинчиларимизнинг ўзларига ишончи янада ортади. Ҳозирги ўрнимиздан келиб чиқсак, қониқарсиз ҳолатдамиз.