Даврон Файзиев: Мухлислар бирлашди ва футболдаги ўрнини кўрсатди

Таниқли журналист ва спорт шарҳловчиси Даврон Файзиев ўз "Телеграм" саҳифасида Суперлига мавзусидаги навбатдаги хабарлар шарҳи билан ўртоқлашди:

"Расман АПЛ клублари Суперлигани тарк этишди. Уларсиз бу турнирни ўтказишдан маъно йўқ. Гарчи лига ҳамон қандайдир баёнотлар билан чиқаётган бўлса ҳам. 2 кун ленталар шу мавзуда ёнди. Европа футболи учун қора пиар бўлди.

Фойдали томони борми? Бор. УЕФА барибир катта клублар дардини эшитишга мажбур бўлди. Ўйлайманки, уларга жазо эмас, аксинча бирор манфаатли таклиф берилади. Ҳар ҳолда, шундай қилса, тўғри бўлади.

Мухлислар бирлашди ва футболдаги ўрнини кўрсатди. АПЛ клубларини УЕФА пўписалари эмас, айнан мухлислар босими ортга қайтарди, назаримда.

Зарари нимада бўлди? Қитъа футболидаги исён бомба эффектини берган ҳолда тепани портлатиши керак эди. Лекин аксинча, зарба тўлқини тескари таъсир қилиб, клублар ичига кириб борди. Жамоаларда раҳбарият ишдан кетишни бошлади. Ички низолар пайдо бўлди. Грандлар ва УЕФА ўртасига барибир совуқчилик тушди.

Мавзу ҳали тўлиқ ёпилмади. Ҳаммаси жуда тез рўй бераётганидан келиб чиқсак, яқин вақт ичида Суперлига масаласига нуқта қўйилса керак", - деб ёзади Даврон Файзиев. 

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар