Даврон Файзиев: Оддий хатолар футболчиларнинг маҳорати билан боғлиқ. Бунда майдонни айблаб бўлмайди

Coca Cola Суперлигаси 16-тур доирасидаги "Сўғдиёна" - "Қўқон-1912" учрашувидан кейинги матбуот анжуманида меҳмонлар катта мураббийи Даврон Файзиев иштирок этди. Бу ҳақда "Қўқон-1912" клуби матбуот хизмати хабар берди.

- “Сўғдиёна” жамоасини ғалаба билан табриклайман. Ўйин ҳақида гапирадиган бўлсам, мана иккинчи ўйиндирки, ўхшаш ҳолат содир бўлмоқда. Биринчи гол ўтказиб юборгач, футболчиларимизда руҳий тушкунлик яққол сезилмоқда. Бу ҳолат “Бухоро” билан бўлган баҳсдан кейин пайдо бўлди. Футболчиларга ўйин охиригача курашиш лозимлигини тушунтиряпмиз. Бугун иккинчи таймнинг бошидаги қизил карточка ҳам ўз таъсири ўтказди.

Бош мурабийимиз айрим сабабларга кўра, ўйинда қатнаша олмади. Шундай бўлса-да, Бахтиёр Аъзамович билан телефон орқали гаплашдик. Мураббийлар штаби таркиб ва ўзгаришларни келишиб олгандик. Аммо режаларимиз иш бермади. Иккинчи давра давом этмоқда. Юқори ўринларни эгаллашни ўйласак, яхши натижаларни қайд этишимиз лозим. Футболчиларни бундай ҳолатдан олиб чиқиш ҳақида ўйлаяпмиз. Бугун ўн киши бўлиб қолган бўлсак ҳам ёмон ўйнамадик, ҳимояга ётиб олмадик. Лекин футболда натижага қаралади. Йигитларга раҳмат айтган ҳолда “Бунёдкор”га қарши баҳсга тайёргарлик кўрамиз.

Агар эътибор берган бўлсангиз, “Бухоро” билан бўлган баҳсда иккинчи гол, “Металлург”га қарши ўйинда биринчи гол ва бугунги голларда ҳам ҳимояда хатога йўл қўйилди. Биринчи даврада яхши ўйнагандик. Фақат ҳимоячиларни айблаш ноўрин. Мағлубиятда барча айбдор. Биз мураббийлар ҳам. Хатолар устида ишлаймиз.

Бош мураббиймизнинг қачон тузалишини билмаймиз. Жамоамиз шифокори бу саволга жавоб беради.

Элементар хатолар футболчилар маҳорати билан боғлиқ деб ўйлайман. Бунда майдонни айблаб бўлмайди. Ютишни истаган жамоа тўғри пас беришни билиши, олдинга пас беришни ўрганиши лозим. Маҳорат йиллар давомида келади. Ишлаш керак. Ўйнамаган хато қилмайди. Ҳамма инсон. Футболчилар ҳам бундан мустасно эмас, - деди Даврон Файзиев.