Даврон Файзиев: Пеле ва Марадона тарихдаги энг буюк футболчи мавзусида кўп солиштирилади. Натижадан келиб чиқиб, кўпинча Пеле устун қўйилади. Бироқ Пеле битта жиҳатдан Марадонага ета олмайди

Кеча футбол афсонаси Диего Марадона вафот этди. Шу муносабат билан таниқли шарҳловчи Даврон Файзиев телеграмдаги саҳифасида унинг фаолиятига тўхталиб ўтди. 

- Пеле ва Марадона тарихдаги энг буюк футболчи мавзусида кўп солиштирилади. Натижадан келиб чиқиб, кўпинча Пеле устун қўйилади. Бироқ Пеле битта жиҳатдан Марадонага ета олмайди. Гап шундаки, ҳар бир спорт турида эталонга айланган битта шахс бўлади. Ўша спорт элементларини оддий одам зўр бажарганда ҳам, айнан ўша эталон шахс номи билан таъриф берилади. Тезкор ҳайдовчилар - Шумахер, ғижимланган қоғоз ёки бўшаган идишни ахлат челакка аниқ улоқтирганлар - Жордан, бир зарбада йиқитувчилар - Тайсон ва ҳоказо. Футбол ҳаваскор даражада дунёда энг кўп ўйналадиган спорт тури. Ва унда энг яхши алдаб ўтадиганлар доим битта ном билан аталган - Марадона! Эталон. Ҳар бир маҳалланинг ўз Марадонаси бор эди.

Одил Аҳмедов: Тарих Марадонадек ўйинчиларни доим эслаб қолишига шубҳам йўқ. У – дунё футболининг ҳақиқий қироли сифатида қолади

Криштиану Роналду: Бугун мен дўстим билан, дунё эса даҳо, энг зўрлардан бири, сеҳргар билан хайрлашди

Йиллар давомида Аргентинада пайдо бўлган супер талантли футболчиларни умид билан “бўлажак Марадона” дея таърифлашади. Аммо ўша талантлар Диегонинг даражасига етмаган ва “бўлажак Марадона”ларни излаш давом этаверган. Ёш авлод Диего Армандонинг ким бўлганини хис этиши учун айтиб ўтаманки, Лео Месси ҳам яқингача “бўлажак Марадона” эди. Тан олиш керак, жаҳон кубогини айтмаса, Месси ўша даражага етди ва аргентиналиклар Марадона излашдан тўхташди. Қайсидир маънода, Диегонинг елкасидаги масъулият юки камайди, Аргентина футболини у олиб чиққан мавқеда ушлаб тура оладиган издош топилди. Шу хотиржамлик ила Диего Марадонанинг буюк ҳаёт йўли якунига етди, - деди Даврон Файзиев.