Даврон Файзиев Суперлига клубида!

14 январь куни 48 ёшни қаршилаган жиззахлик мураббий Даврон Файзиев ҳақида гап кетганда кўпчилик уни асосан қийин вазиятга тушиб қолган клубларни бошқариши ва улар учун қутқарувчи ролидаги мутахассис сифатида кўз олдига келтиради.

Унинг охирги жамоаси про лигада “Қўқон-1912” бўлди. Аввалига у ерда ёрдамчи мураббий бўлиб ишлади, кейинчалик бош мураббий лавозимига ўтди. Ўтган йилнинг ярмида эса оилавий сабабларга кўра клуб билан хайрлашганди. Шундан бери Даврон Орифович футболдан бироз четда эди.

2024 йилдан у яна қайноқ иш фаолиятига қайтди, десак муболаға қилмаймиз. Гап шундаки, Даврон Файзиевга ОКМК клубидан таклиф келиб тушган. Натижада жиззахлик мураббий бунга ижобий жавоб қайтарган ва Миржалол Қосимов бошчилигидаги мураббийлар штабига қўшилган. Меҳнаткаш мутахассис учун бу яхши танлов ва айниқса, ОКМК учун ҳам.

Даврон Файзиевнинг мураббийлик фаолияти ҳозирга қадар 4 та клуб билан боғлиқ эди. Булар – “Сўғдиёна”, “Динамо”, “Бухоро” ва “Қўқон-1912” эди. Мураббийлик фаолиятини 2012 йилдан бошлаган мутахассис турли йиллар давомида бош мураббий ва ёрдамчи мураббий лавозимларида хизмат кўрсатди. Айтиш лозимки, мутахассис бу вақт давомида ўзидан ёмон таассурот қолдирмаган. Қайтанга, ўз меҳнати ва иши билан қийин ҳолатдаги жамоаларни “ушлаб” турган.

Файзиевнинг маҳорати албатта Миржалол Қосимов ва унинг жамоасига қўл келади. Аслида ҳам Олмалиқ клубининг Даврон Орифович номзодини маъқуллагани бежиз эмас. Ҳозирги трансфер сиёсатида таркибни ёшартиришга эътибор қаратилаётган пайтда Даврон Файзиевнинг билими ва маслаҳатлари асқотиши тайин. Чунки у ҳам ёшлар билан қандай ишлашни яхши ўзлаштирган.

Қўқондан кетгач, кўпчиликда уни энди қайси клубда иш бошлаши ҳам қизиқтирганди. Балки бу нарса мутахассиснинг ўзига ҳам қизиқ бўлиб кўринган бўлиши мумкин. Эндиликда у анчагина яхши шароит ва имкониятларга эга бўлган, олдига жиддий вазифа қўядиган клубда фаолият олиб боради. У бунга муносиб эди...

Шуҳратбек Жўраев.