Де ла Фуэнте ЖЧ-2026 финалидан кейин аргентиналикларнинг хатти-ҳаракатини қабул қилиб бўлмас деб атади

Испания терма жамоаси бош мураббийи Луис де ла Фуэнте Жаҳон чемпионати–2026 финалидан сўнг Аргентина терма жамоаси футболчилари ўзини тутишига муносабат билдирди. Унинг таъкидлашича, майдонда содир бўлган ҳолатлар «қабул қилиб бўлмайдиган ва мутлақо номақбул».

Можаро «Нью-Йорк Нью-Джерси» стадионида, испанлар тарихда иккинчи бор жаҳон чемпиони бўлгани эълон қилинган заҳоти юзага келган. Испания қўшимча дақиқаларда 1:0 ҳисобида ғалаба қозонган эди.

Тортнишув марказида Науэль Молина ва Леандро Паредес қолди. Молина Родрига ташланса, Паредес Эрик Гарсия билан тортишиб қолган. Шунингдек, Паредес Гави билан ҳам оғзаки жанжалга киришгани айтилмоқда.

«Ўша пайтда нима бўлаётганини тушунмаганман. Мен ғалабани нишонлар, жамоадошларимни қучоқлардим, — деди Де ла Фуэнте испан телевидениесига берган интервьюсида. — Лекин қандай ҳолат бўлишидан қатъи назар, буни оқлаб бўлмайди. Бундай нарсага ўрин йўқ. Ўйин олдидан ҳам, ҳозир ҳам мақтаётганим, юқори даражадаги футболчилар, ажойиб мураббий қўл остидаги катта маҳорат эгалари — уларнинг ўзи ҳам бу реакцияларни биз каби оғир қабул қилганига ишонаман».

Испания мураббийи айни пайтда ўз шогирдларининг майдондаги хулқ-атворини алоҳида таъкидлаб ўтди. Унинг сўзларига кўра, испан футболчилари «таҳқирлаш ва тажовуз актлари», «провокациялар»га дуч келган, бу эса вазиятни янада жиддий тўқнашувларга олиб бориши мумкин эди.

Майдондаги тортишувлар видеога олинган ва қисқа вақт ичида ижтимоий тармоқларда кенг тарқалган. Шунга қарамай, ҳозирча Аргентина терма жамоаси ўйинчиларига нисбатан расмий жазо чоралари қўлланилгани йўқ. ФИФА бу эпизодлар бўйича текширув бошлаган, у орқали жаҳон футболи бош ташкилоти интизом кодекси моддалари бузилган-бузилмаганини аниқлаш режалаштирилган.