Диетолог Жозеф Паркернинг дисквалификация қилинишида айбдор бўлиб чиқди

Британия допингга қарши кураш агентлиги (UKAD) ўтказган текширув натижаларига кўра, оғир вазн собиқ чемпиони Жозеф Паркер(36-4, 24 KO)нинг допинг намунасидан кокаин излари аниқланишига унинг диетологи айбдор бўлиши мумкин. Ушбу тест Паркернинг Фабио Уордлига қарши мағлуб бўлган куни олинган эди.

Янги Зеландиялик боксчи бошиданоқ ҳар қандай тақиқланган моддани атайлаб қабул қилмаганини қатъий тарзда таъкидлаб келди ва якунда ўзини оқлаш учун етарли далиллар тўплашга муваффақ бўлди.

UKAD баёнотига кўра, Уордлига қарши жанг учун Паркер томонидан ёлланган диетолог мунтазам равишда кокаин истеъмол қилган. Унинг ўзи ҳам жангдан олдинги ҳафта давомида ҳар куни кокаин қабул қилганини тан олган.

Кеча эса Паркернинг рингга қайтишига рухсат берилгани ҳақида расман хабар қилинди. Демак, яқин вақт ичида бокс мухлислари уни яна катта жангларда кўришлари мумкин.