Дилявер Ваниев: Мен бош мураббий эмас, катта мураббийман

Суперлигада Қашқадарё вилоятидан бўлган клублар сони иккитага етди. Олдинлари ушбу вилоятдан элитада бира тўла учта жамоа – “Насаф”, “Шўртан” ва “Машъал” қатнашиб келарди. Охирги пайтларда эса футболимиздаги турли ислоҳотлар ҳамда ушбу вилоятда ҳам бироз пасайиш бўлгани сабабли биргина “Насаф” вилоят номидан чемпионатда иштирок этиб келаётганди. Бу йил эса Муборакнинг “Машъал” клуби ҳам Суперлигага чиқди ва Қашқадарёда яна футбол жонланаётгандек.

Энди бевосита “Машъал”даги ўзгаришларга тўхталадиган бўлсак, хабарингиз бор, про-лигада жамоага Асрор Алиқулов бош мураббийлик қилди. Мавсум тугаганидан кейин ушбу мутахассис дўстона равишда “Машъал” билан хайрлашди ва “Шўртан”да иш бошлади. Натижада Суперлигада “Машъал”га ким бош мураббийлик қилиши кун тартибига чиқди. Аввалига Виктор Жалилов клубда иш бошлагани айтилганди. Амом кейин воқеалар ривожи ўзгарди. Жамоани эса қишки йиғин чоғида асосан Дилявер Ваниев тайёрлади десак ҳам бўлаверади. У кўп йиллардан бери “Машъал” клубида турли лавозимларда ишлаб кемоқда. Футболчи сифатида ҳам фаолиятининг катта қисмини муборакликлар таркибида ўтказган. Уни “Машъал” клубининг афсонаси десак ҳам муболаға қилмаган бўламиз. Яқинда эса жамоа айнан Ваниевни бош мураббий сифатида эълон қилди. Бироқ унинг ўзи бу хабарни тасдиқламади. Аммо Ваниев жамоани ҳар бир ўйинга ўзи тайёрлаши маълум бўлди. Ўзи билан боғланиб айрим саволларга жавоб олиш асносида аслида ким бош мураббий эканлигини ҳам айтди.

- Сиз кўп йиллардан бери “Машъал”да фаолият кўрсатиб келмоқдасиз. Айтиш мумкинки, жамоанинг яхши ва ёмон кунларида ҳам бирга бўлгансиз. Айтинг-чи, узоқ йиллардан бери сизни бу ерда нима ушлаб турибди?

- Бу клубда футбол ўйнашни бошлаганман ва “Машъал”да менинг номим чиққан. Айтишим керакки, “Машъал” ҳаётимда катта аҳамиятга эга. У ерда ўзимнинг хайрлашув учрашувимни ўтказганман. Айнан 2014 йили футболчилик фаолиятимни тугатдим. Ўшанда “Насаф” билан учрашувда 20 дақиқача майдонда ўйнаганман ва бу менинг хайрлашув ўйинимга айланганди. Шундан кейин ҳам клубда қолиб бошқа лавозимларда ишни давом эттирганман. Бир сўз билан айтганда, “Машъал”дан жуда миннатдорман. Чунки юқорида айтиб ўтганимдек, ушбу жамоада мен футболчи сифатида етишиб чиққанман. Клубнинг яхши ва ёмон кунларида ҳам бирга бўлганман. Кейинчалик ҳам клубга садоқат билан ишлашда давом этавераман. Умид қиламанки, биз биргаликда яна яхши кунларни кўрамиз. Ўзингиз кўриб турибсиз, мен бу жамоада анча йиллардан бери ишлаб келяпман. Бу вақт давомида эски ва янги раҳбарлар билан ҳам ишладим. Ҳамма вақт мен ким билан ишлаган бўлсам доимо тил топишиб меҳнат қилганмиз. Бемалол айта оламанки, “Машъал” ўз меҳнатлари эвазига нафақат Қашқадарёда, балки Ўзбекистонда ўз обрўсига эга бўлган клубдир. Бу ердан кўплаб футболчилар етишиб чиққанлигини ҳам барча яхши билади. Чунки “Машъал” ўз академиясидаги тарбияланувчиларига кўпроқ эътибор беради. Олдинлари мен ушбу жамоада спорт директори лавозимида ишлаб келдим. Ҳозир эса катта мураббий лавозимида фаолият олиб боряпман. Айни пайтда эса бор эътиборимни асосий таркиб ўйинчиларига ва улар билан ишлашга қаратганман.

- Суперлига номи остида ўтаётган чемпионатда “Машъал” илк бор иштирок этади. Чунки бунгача муборакликлар фақат эски олий лига деб номланган чемпионатда қатнашганди. Ҳозирда эса таркибда асосан ҳали Суперлигада қатнашмаган ёш ўйинчилар кўпроқ. Шунингдек, таркибга айрим легионерлар ҳам қўшилишган. Нима деб ўйлайсиз, “Машъал” ушбу мавсумда сюрприз кўрсата олишга қодирми? Умуман, клубдан нима кутиш мумкин?

- Биринчи навбатда айтишим керакки, биз дебютант жамоа эмасмиз. Негаки, билсангиз “Машъал” салбий натижалар туфайли қуйи лигага тушиб кетмаганди. Шунчаки, ўша пайтда жамоамизни қандайдир сабабларга кўра кучлилар орасидан чиқариб юборишганди. Шунинг учун ҳам “Машъал”ни Суперлигада дебютант деб ҳисоблай олмайман. Тўғрисини айтсам, бу йилги таркибни шакллантириш бизга қийинчиликларни туғдирди. Нимагаки, охирги пайтларда академиямиз озгина оқсаб қолганди. Натижада у ердан етарли даражада иқтидорли ёшлар етишиб чиқмаётганди. Шунга қарамасдан биз асосий эътиборимизни ўзимизнинг маҳаллий тарбияланувчиларимизга қаратганмиз. Нима бўлганда ҳам биз учун таркибни шакллантириш ўзига яраша қийинчиликларни туғдирмоқда. Айниқса, селекция ишларида ўзимиз истаганчалик фаоллик кўрсата олмадик. Биз эса яна селекцияни давом эттиришимиз керак. Ўзингиз ҳам яхши биласиз, чемпионат жуда қийин кечади, шу боис у ерда муносиб иштирок этиш жамоамиз учун оғир бўлишини яхши тушуниб турибмиз. Шунга қарамасдан биз ҳаракат қиламиз. “Машъал”нинг ўз ўйин услуби бор. Азалдан бери клуб ўзининг ўйини борасида тегишли анъаналарига эга. Биз эса бош мураббий билан самарали иш олиб борган ҳолда ўйин услубимиздан воз кечмаймиз.

- Лекин ёшларнинг ўзи билан чемпионатда муносиб қатнашиш ҳам мураккаб жараён ҳисобланади. “Машъал” катта даражадаги трансферларни амалга оширгани йўқ. Ҳозирги таркиб билан эса сизларга қўшимча муаммолар туғдирмайдими?

- Тўғри айтяпсиз, ёш футболчилар билан Суперлигада қатнашиш жамоамиз учун жуда қийин бўлади. Легионерларга келадиган бўлсак, уларни биз катта пуллар эвазига олиб келганимиз йўқ. Улар ўйнайдиган позицияга ўзимиздан футболчиларни қидирганмиз-у, аммо ўзимиз хоҳлаган ўйинчиларни топа олмадик. Натижада ички имкониятларимиздан келиб чиққан ҳолда легионерларни олиб келишга қарор қилдик. Жамоамиз ҳар қандай ҳолатда ҳам охиригача кураш олиб боради. Чемпионат давомида қўлимиздан келган барча чорани кўрамиз ва мухлисларимизни хурсанд этиш учун бор имкониятимизни ишга соламиз.

- Қизиқ, жамоада бош мураббий ким?

- Мен катта мураббийман. Бош мураббий эса Зоир Тўрақулов.

 

Фикрлар

Фикр қолдириш учун авторизациядан ўтинг!
&
Ibratjon Hikmatjon
28/02/2020 07:01
Dilyaver chimchi Mashalga Navbahorda tanilib keyin ketgansanu Navbahorga Chilonzordan kelgansan pul uchun Andijonda ham uynagansan