"Динамо" ўртоқлик ўйинида "Бунёдкор"ни йирик ҳисобда таслим қилди

Суперлигада юзага келган танаффусдан фойдаланиб, «Динамо» жамоаси бугун Тошкентда «Бунёдкор»га қарши майдонга тушди.

«Бунёдкор» футбол академияси майдонида ўтган баҳсда Вадим Абрамов шогирдлари Илёс Зейтуллаев мураббийлигидаги «қалдирғочлар»дан устун келди. Биринчи бўлимда ҳисоб очилмаган бўлса, иккинчи бўлимда самарқандликлар ҳужумкор ўйин намойиш этиб, ҳисобни очди.

50-дақиқада Жалолиддин Жумабоев узоқ масофадан йўллаган голи билан ҳисобни очган бўлса, 67-дақиқада Нурулло Тўхтасиновнинг узатмасидан кейин Азизбек Амонов иккинчи голга муаллифлик қилди. 80-дақиқада эса Анваржон Ҳожимирзаевнинг пасидан кейин Азизбек Амонов навбатдаги чиройли голи билан дублга эришди – 3:0.

Шу тариқа, «Динамо» Тошкентдаги ўртоқлик ўйинида мезбон жамоа устидан йирик ҳисобда ғалабага эришди.

Назорат ўйини. Тошкент
26 март (пайшанба)
«Бунёдкор» - «Динамо» - 0:3
Голлар: Жалолиддин Жумабоев 50, Азизбек Амонов 67, 80.

Маълумот учун, «Динамо» Суперлига 5-турида 3 апрел куни «Хоразм» меҳмони бўлади.