"Динамо" U21 жамоасига техник мағлубият ёзилади!

"Суперлига 9-тури доирасида кеча "Динамо" — "Сурхон" ўйини бўлиб ўтди. Одатга кўра, бугун — 10 май куни ҳар икки клубнинг У21 жамоалари ўзаро майдонга тушиши керак эди. 

"Динамо" клуби 6 май куни Лигага хат йўллаб, учрашувни Жиззах шаҳрида ўтказишни сўради. Бу билан клуб “Суперлига ва Пролига регламенти”нинг 15.8-бандини бузди. Яъни, учрашувга 4 кун вақт қолганда регламентда кўзда тутилмаган масала юзасидан мурожаат қилди. 

"Динамо" клубининг мазкур таклифига гарчи "Сурхон" клуби розилик билдирган бўлса-да, Лига регламентнинг 5.5-бандидан келиб чиқиб, учрашувни Термизда ташкил этиш масаласини илгари сурди. Бироқ "Сурхон" клубининг аксар футболчилари машғулотларни Тошкентда олиб бораётгани, "Динамо" клуби мазкур масалани "Сурхон" билан аввалдан келишмагани туфайли жамоанинг Термизга етиб бориш чипталари харид қилинмагани, ўз навбатида "Сурхон" учрашувни ташкил этиш билан боғлиқ зарур масалалар юзасидан тегишли ташкилотлар билан келишмаганлигидан келиб чиқиб, термизликлар "Динамо" У21 жамоасини республиканинг жанубида қабул қила олмасликларини маълум қилишди. Бунинг оқибатида Лига "Динамо" У21 жамоасига техник мағлубият ёзди.  

Маълумки, У21 жамоаси учун майдони қабул қилиб олинмаган клуб рақиб майдонига сафар этиши лозим. Айнан шу талаб бўйича "Қизилқум" ва "Навбаҳор" жамоалари илк турдаёқ техник мағлубиятга лойиқ кўрилганди. Шунингдек, майдони талаб даражасига келгунига қадар "Нефтчи", "Андижон", "Хоразм", "Бухоро" жамоалари ҳам рақиб майдонига боришига тўғри келди.

Лига регламентда аввалдан белгилаб қўйилган масала юзасидан бир неча клубга бир неча хил стандарт қўллай олмайди. Шунингдек, клублардан ўз ҳудудларида машғулот майдонлари, ёшлар жамоалари майдонларини барпо этишни ҳамда бу масалани қўшни вилоят майдонлари орқали ҳал қилишга уринмасликни сўрайди", - дейилади ЎзПФЛ матбуоти хабарида.