Доннарумма: "Дунёдаги ҳар бир футболчи "Манчестер Сити"да ўйнашни истайди"

"Манчестер Сити"нинг янги аъзоси Жанлуижи Доннарумма Франциянинг ПСЖ клубидан "шаҳарликлар" сафига ўтганидан кейин баёнот берди.

"Манчестер Сити" билан шартнома имзолаш мен учун ўзига хос лаҳза. Мен жаҳон даражасидаги истеъдодлар жамланган ва футбол тарихидаги энг буюк мураббийлардан бири бошқараётган жамоага қўшилмоқдаман. Бу дунёдаги ҳар бир футболчи ўтишни истайдиган клуб!

Мен кўп йиллар давомида "Манчестер Сити"ни ҳайрат билан кузатганман, шунинг учун энди бу клубда ўйнаш имкониятига эга бўлиш - улкан шараф ва имтиёз. Янги жамоадошларим, ходимлар ва мухлислар билан учрашишни сабрсизлик билан кутяпман. "Этиҳад" стадионидаги ўйин мен учун жуда ўзгача бўлади.

Олдинда мени нима кутаётганидан жуда ҳаяжондаман ва клубга янада кўпроқ муваффақиятга эришишда ёрдам беришга ҳаракат қилиш учун боримни беришга ваъда бера оламан", - дея Доннарумманинг сўзларини келтирди "Манчестер Сити" сайти.