Достон Ҳамдамов: "Футбол тилида айтганда "десятка" амплуасига ўйинчи олсак бўлгани"

"Пахтакор" клуби етакчи футболчиларидан бири Достон Ҳамдамов Туркиядаги йиғин, бўлажак режалари ва мақсадлари ҳақида клуб матбуотига интевью берди.

"Туркиядаги биринчи хориж йиғинини бошладик. Жисмоний тайёргарликка зўр беряпмиз. Ўтган йилни иккинчи даврасини чиройли ўтказдик. Шу савияда ўйнашимиз керак.

Фақат Игорь Сергеевни ўрнини боса оладиган битта яхши ҳужумчи ва футбол тилида айтганда "десятка" амплуасига ўйинчи олсак бўлгани. Қолган нуқталарда рақобат кучли, қолаверса академиямизни жуда кўплаб истеъдод эгалари керакли жойларни ёпа оладилар. Пайтида биз ҳам шундай ёш бўлиб катта майдонга кириб келганмиз.

- Фаолиятимда бир маротаба "требл" қайд этганман. Буни такрорлайдиган пайт келди деб ўйлайман. 2026 йилги "Пахтакор" олдида мақсадлар катта. Суперкубокни қўшиб ҳисоблаганда, 4 та мусобақада яхши иштирок этишимиз керак. Қолаверса, ўзим Ўзбекистон миллий терма жамоаси сафида ўрин олиш учун меҳнат қилишим керак. Бу йил фан клубимиз ва ҳомийларимизни хурсанд қиламиз", - деди Ҳамдамов

Маълумот учун, 5 маротаба Ўзбекистон чемпиони ва уч карра кубок соҳиби бўлган 29 ёшли вингер "Пахтакор" сафида 207 та ўйинда майдонга тушиб, 36 та гол урган ва 40 та ассистни амалга оширган.