Эдегор: "Иккинчи тайм — қабул қилиб бўлмас даражада ёмон эди"

"Арсенал" сардори Мартин Эдегор АПЛнинг 35-туридан ўрин олган 'Борнмут"га қарши учрашувдаги мағлубиятдан сўнг ўз фикрларини билдирди. Учрашув 1:2 ҳисобида якунланди. Лондонликлар таркибида ягона голни 34-дақиқада Эдегорнинг узатмасидан кейин Деклан Райс киритган.

"Бу катта ҳафсаласизлик. Менимча, биз ўйинни анча яхши бошладик. Гол урдик ва деярли барчасини назорат қиляпмиз деб ўйладик. Аммо рақиб гол урганидан кейин назоратни йўқотдик. Шундан сўнг ўйинимиз ритмдан чиқиб кетди. Иккинчи тайм — мутлақо қабул қилиб бўлмайдиган даражада ёмон бўлди.

Бу ўйинни таҳлил қилиб, олдинга қараш керак. Олдимизда катта баҳс турибди. Биз барча мусобақаларда курашишни истаймиз. Бу ерга яхши ўйнаб, ғалаба қозониш ниятида келгандик, афсуски, бундай бўлмади" – деди Эдегор.

Энди "канонирлар" 7 май куни Парижда ПСЖга қарши Чемпионлар лигаси ярим финали жавоб баҳсида майдонга тушади. Биринчи ўйинда лондонликлар 0:1 ҳисобида мағлуб бўлишган.