Эксперт ҳакамлар ОКМК - “Андижон”, “Қизилқум” - “Навбаҳор” ўйинида фаолият олиб борган ҳакамлар фаолиятини таҳлил қилди

Суперлиганинг 8-туридан ўрин олган ОКМК — “Андижон” учрашувининг 60-дақиқасида ОКМК футболчиси тўпсиз вазиятда рақиб жамоа вакилининг юзига тирсак билан зарба берди. Бош ҳакам Рустам Лутфуллин ушбу ҳолатда ВАР ҳаками билан маслаҳатлашган ҳолда тўғри қарор чиқарди ва тегишли чорани кўрди.

Бироқ, беллашувнинг 85-дақиқасида баҳсли пеналти ҳолати юзага келди. Футболчилар ўртасида тўп учун кураш давомида бош ҳакам пеналти белгилади. Аммо вазиятни таҳлил қилган эксперт ҳакамлар қарорига кўра, ушбу ҳолатда 11 метрлик жарима зарбаси тайинланмаслиги керак эди. 

Ҳакамлар қўмитаси қарорига кўра, Рустам Лутфуллин хатоликка йўл қўйгани учун номуайян муддатга четлатилди.

Шунингдек, “Қизилқум” — “Навбаҳор” ўйинининг 90+5-дақиқасида бош ҳакам Аҳрол Рисқуллаев “Навбаҳор” футболчисининг қўлига теккан тўп сабабли пеналти белгилади. ВАР орқали вазият текширилгач, қарор ўзгаришсиз қолган ва 90+12-дақиқада ушбу пеналти амалга оширилган. Аммо экспертлар ушбу ҳолатда футболчининг қўли танасига ёпишиб тургани боис пеналти тайинланмаслиги керак деб топди. 

Ҳакамлар қўмитаси қарорига кўра, Аҳрол Рисқуллаев ҳам ўйинда йўл қўйган хатоси туфайли номуайян муддатга четлатилди.