Эллик тўққиз ёшли футболчи жамоаси билан янги бир йиллик шартнома имзолади

Япония футболи афсонаси, ҳужумчи Кадзуёши Миура "Йокогама" клуби билан шартномасини яна бир мавсумга узайтирди. Бу ҳақда жамоа матбуот хизмати хабар берди.

Янги келишув бир мавсумга мўлжалланган. Шу давр мобайнида Миура Япония чемпионатининг учинчи дивизионида иштирок этадиган "Фукусима Юнайтед" жамоасида ижара асосида майдонга тушади.

59 ёшли Миура 2005 йилдан бери "Йокогама" шарафини ҳимоя қилиб келмоқда. У шу вақтгача ижара асосида Япониянинг "Судзука Пойнт Геттерс" ва "Атлетико Судзука" клубларида, шунингдек, Австралиянинг "Сидней" ҳамда Португалиянинг "Оливейренсе" жамоаларида ўйнаган.

Футболчи карьераси давомида Бразилиянинг "Палмейрас", "Коритиба", "Сантос", шунингдек, Загребнинг "Динамо" ва Италиянинг "Дженоа" клубларида ҳам тўп сурган. 

Миура икки карра Япония чемпиони ҳисобланади, 1992 йилда эса Япония терма жамоаси таркибида Осиё кубоги ғолиблигини қўлга киритган. Келаси мавсум унинг профессионал карьерасидаги 42-мавсум бўлади.