Энди бизга керак эмассан! "Барселона" ёш иқтидор трансферидан воз кечди

Билбаонинг "Атлетик" клуби ҳужумчиси Нико Уильямс катта эҳтимол билан "Барселона" футболчисига айланмайди.

"Mundo Deportivo"нинг хабар беришича, "Барселона" раҳбарияти 22 ёшли испаниялик футболчига бўлган қизиқишини йўқотган. Ўтган йилнинг ёзги трансферлар ойнасида каталонияликлар футболчини сотиб олмоқчи эди. Бироқ, мазкур трансфер амалга ошмади.

Жорий мавсум Уильямс барча мусобақаларда 32 та ўйинда иштирок этиб, рақиблар дарвозасини 6 марта ишғол қилди ва 7 та голли узатмага муаллифлик қилди.

Эслатиб ўтамиз, футболчининг "Атлетик" билан тузилган шартномаси 2027 йил июнь ойи охиригача амал қилади. Transfermarkt порталининг маълумотларига кўра, футболчи 70 миллион еврога баҳоланмоқда.