"Endi erkin agentga aylandim" - sovrinlarni yutgan legionerimiz klubidan ketdi

Bir necha mavsum mobaynida Bangladesh chempionatining birinchi raqamli klubida to‘p surgan hamyurtimiz Asror G‘ofurov u erda qator sovrinlarni qo‘lga kiritdi. Esda qolarli yoqimli onlari ko‘p bo‘ldi. Endilikda hamyurtimiz faoliyatini boshqa jamoada davom ettiradi. Boisi, Asror “Bashuxandra Kings” klubini tark etdi.

- Asror, eshitishimcha, Bangladesh klubini tark etibsiz. U erda to‘p surishdan charchadingizmi yoki boshqa sababi bormi?

- Ha, “Bashuxandra Kings” klubini tark etdim. Bangladeshda ancha vaqt to‘p surdim. Ozgina charchadim, desam ham bo‘ladi.

- Oldingizda qanday takliflar bor? Yurtimizga qaytasizmi yoki yana chetda to‘p surmoqchimisiz?

- Endi erkin agentga aylandim. Takliflar bor, o‘zimizdan ham, boshqa mamlakatlardan ham. Albatta, o‘ylab bir qarorga kelaman.

- Bangladeshdagi faoliyatingiz mobaynida sizga yoqqan va yoqmagan narsa nima bo‘ldi?

- Bangladesh chempionatidagi 3 yillik faoliyatimda 2 bor mamlakat chempioni, 2 marta mustaqillik Kubogi va 1 marta federatsiya Kubogi sohibiga aylandim. Yoqqan jihatlari ko‘p bo‘ldi. Yoqmagan tomonlariga kelsak, u erdagi ob-havo: har doim issiq va yomg‘ir edi.

- Superligamizni kuzatayotgandirsiz. Bu yilgi daraja va sifatga nima degan bo‘lardingiz va ko‘proq qaysi klublar yoqyapti

- Aynan bir klubni alohida ko‘rsatishim qiyin. Hamma jamoalar kurashishyapti va intrigani yaratishyapti.

- Bangladeshning eng kuchli klubida o‘ynadingiz va har yili sovrinlar yutdingiz. Kuboklarni qo‘lga kiritishga o‘rganib qolmadingizmi? Balki keyingi klubingizni tanlashdayana sovrinlar yutadigan jamoaga e’tibor qaratayotgandirsiz...

- Bu – futbol. To‘g‘ri, chempionlik va Kuboklarni yutish juda yoqimli. Lekin har doim ham chempion jamoada o‘ynayvermaysiz. Bularning barchasi taqdir.

- Sir bo‘lmasa aynan kaysi mamlakatlardan takliflar bo‘lyapti?

- Takliflar bor. O‘zbekiston, Indoneziya, Tailand va Bangladesh klublaridan qiziqishlar bo‘lyapti. O‘zim uchun ma’qul jamoani tanlayman.

Shuhratbek Jo‘raev.