Энг зўр қиличбозлар аниқланди

Пойтахтимиздаги «Пахтакор» қиличбозлик спорт мажмуида катталар ўртасида Ўзбекистон чемпионати баҳслари қизғин ўтмоқда.

Қорақалпоғистон Республикаси, вилоятлар ҳамда Тошкент шаҳридан 90 нафарга яқин спортчи  қиличбозликнинг шпага, рапира ва сабля йўналишидаги яккалик ҳамда жамоавий беллашувларда чемпионлик учун кураш олиб боряпти.

Шпага бўйича ўтказилган яккалик баҳсларида ўғил болалар ўртасида Мейирхон Темуров (Навоий), қизлар ўртасида эса Бийбимарям Сапарова (Қорақалпоғистон Республикаси) ғолиблик шоҳсупасининг энг юқори поғонасидан ўрин эгаллади.

Жамоавий баҳсларда эса «Тошкент-1» (қиз болалар) ва «Андижон-1» (ўғил болалар) клублари ғолиб бўлди.

Рапира бўйича яккалик баҳсларида Мафтуна Давронова (Фарғона) тенгдошлари ўртасида моҳир ва абжир эканлигини намоён этиб, ғолиб бўлди.

Ўғил болалар ўртасида эса Радмир Семенеев (Андижон) ғолиблик шоҳсупасининг энг юқори поғонасига кўтарилди.