Эрик тен Хаг бой берилган ғалаба айбдорларини қаттиқ танқид қилди

“Манчестер Юнайтед” Европа лигасининг умумий босқич биринчи турида ўз мухлислари кўз ўнгида “Твенте”ни енголмади.

Мезбонлар ҳисобда олдинда борган бўлса-да, нидерландияликлар 68-дақиқада вазиятни тенглаштиришга муваффақ бўлди.

Ўйиндан кейин Эрик тен Хаг шогирдларини танқид қилди.

- Ҳисобда олдинда бораётган ва ўйинни назорат қилаётганимизда ишни охирига етказиб қўйишимиз керак. Иккинчи бўлимда даражамизни тушириб юбордик ва тўп ўтказдик. Ўз хатоларимиз учун жазоландик.

Ўтказилган гол учун бутун жамоа жавобгар. “Твенте” ўйинчиси майдон бўйлаб югуриб келди ва уни ҳеч ким тўхтатмади. Бунақа тарзда гол ўтказиб бўлмайди.

Бу гал ҳам ўйин охиригача ҳаракат қилиш кераклигига амин бўлдик. Ҳисобни очдингми, иккинчи голни уриш керак, - деди Эрик тен Хаг.