"Евро-2020". Иродали ғалабага эришган Бельгия плей-оффга чиқди

Ҳозиргина Европа чемпионати "B" гуруҳи 2-туридан ўрин олган Дания ҳамда Бельгия терма жамоалари ўртасидаги ўйин ўз ниҳоясига етди. Копенгаген шаҳридаги "Паркен" стадионида кечган учрашувда ҳисобни мезбонлар очди.

Юсуф Поульсен 2-дақиқада Куртуа қўриқлаётган дарвозани ишғол қилди. Иккинчи бўлимда Роберто Мартинес бир қатор етакчи футболчиларни захирадан майдонга туширди. 55-дақиқада айнан захирадан ўйинга қўшилган Де Брюйненинг узатмасидан сўнг Торган Азар ҳисобни тенглаштирди.

70-дақиқада эса Кевеннинг ўзи рақиб дарвозасини ишғол қилди ва жамоасига иродали ғалабани тақдим этди. Шу тариқа, "қизил иблислар" ҳисобидаги очколар сони 6 тага етди ва жамоа муддатидан олдин плей-офф йўлланмасини қўлга киритди. Гуруҳдаги ҳар икки баҳсни бой берган Дания эса 0 очко билан 4-ўринни эгаллаб турибди.