Фамилияга қараб ўтирмаймиз, ҳимоявий футбол менга қизиқ эмас, услубни ўзгартирамиз - Ёрқин Назаров Суперлигадаги дебютига қандай тайёрланяпти?

Хабарингиз бор, кеча “Андижон” клубида бош мураббий ўзгарди. Бунгача ишлаб келган Отабек Ғуломхўжаев истеъфога чиқарилди. У билан бирга меҳнат қилган Ёрқин Назаров вақтинча бош мураббий этиб тайинланди.

Энди бор масъулият ушбу мутахассиснинг зиммасига юклатилди. Sports.uz мухбири эса Назаров билан мавжуд вазият ва “Андижон”нинг кейинги ўйинлари борасида суҳбатлашди.

- Ёрқин ака, “Андижон”нинг ортда қолган учрашувларида нима етишмади, деб ўйлайсиз?

- Жамоамиз ёш. Менимча, тажриба етишмади. Уларни устида ишлашимиз керак, бир-бирига соғлом рақобатни юзага келтиришимиз лозим. Таркибда ўзгартириш киритиб, ўша рақобатни ошириш муҳим. Шунда футболчи ўрнимда бошқаси ҳам ўйнай олади, деган тушунчага эга бўлади. Машғулотларда футболчиларни фамилиясига қараб ўтирмаймиз. Ким ўзини яхши томонлама кўрсатса, ўша футболчи ўйнайди. Машғулотда яхши ишласа, бу ўз навбатида ўйинга ҳам ўтади. Куни кеча бир журналист кам гол уряпсизлар, деганди ва у тўғри гапирди. Эртадан машғулотимизда фақат ва фақат ҳужумга ишлаймиз. Худо хоҳласа, ҳужумкор ўйин кўрсатишга ҳаракат қиламиз. Мен ҳам асосан ҳужумкор ўйин тарафдориман. Ҳимоявий ўйин, қарши ҳужум ёки нолга ўйнаш, деган тушунчалар менга унчалик қизиқ эмас. Мураббий сифатида ҳужумкор футболни ёқтираман ва шуни амалда қўллашга ҳаракат қиламиз.

- Жамоада бош мураббий кетгани ва воқеалар ривожининг бундай ўзгариб кетишини кутмаганингиз аниқ. Бош мураббийликни сизга ишониб топширишганига муносабатингизни билмоқчиман.

- Бу тўсатдан юз берди. Отабек Ғуломхўжаев раҳбарият билан гаплашиб чиққанидан кейин мен кетяпман деди. Сўнгра, мени чақиришди ва сизга имконият берамиз дейишди. Уларга ўйлаб кўришимни айтдим. Барчасини ўйлаб чиққанимдан кейин қабул қилдим. Фикримча, барибир жамоага бошқа мураббийни олиб келгани билан ёрдам бериши қийинроқ. Чунки футболчилар ёш ва улар билан танишиб чиққунича ҳам вақт керак. Бизга эса бу ердаги ҳаммаси яхши маълум. Ярмидан кўпи ўзимизни шогирдларимиз ҳисобланади. Қандай қабул қилдим? Бу мураббийнинг ҳаёти. Назаримда, Отабекни натижа учун ишдан бўшатишмади. Раҳбарлар билан ўзаро гаплашгач, шундай қарорга келишди. Ҳозирги вазият мен учун қўрқинчли ҳолат эмас. Яхши жамоа қилишга ҳаракат қиламиз. Йўл қўйган камчиликларимизни тўғрилашга, жамоа ўйинини янада яхшилашга бор маҳоратимизни ишга соламиз.

- Бунгача Отабек Ғуломхўжаевнинг услуби ва унинг дастури бўйича ишлаб келинаётганди. Эндиликда жамоа сизга топширилгач, яна собиқ мураббийнинг қўллаётган услуби бўйича ишни давом эттирасизми ёки...

- Ўзгартирамиз. Сабаби, олдинги дастуримиз бизга кутилган натижани бергани йўқ. Шунинг учун ўйин услубимизга ўзгартириш киритишимиз аниқ. Агар буниси ижобий натижа келтирмаса, яна ўзгартирамиз. Менда тайёргарлик кўриш учун вақтим кам. 5 май куни ўйинимиз бор, кейин 11 майда ҳам. Кетма-кет ўйинларимиз турибди. Машғулот жараёнимизга ўзгартириш киритиб, вазиятни яхши томонга буришга ҳаракат қиламиз. Агар ўзгартириш киритмасак ўша натижа яна такрорланиши мумкин. Жамоамиздан хафа бўлган мухлислар ўйинимизни телевизордан ёки интернет орқали томоша қилишадими, билмадим. Аммо мақсадимиз ишқибозларни яна стадионга қайтариш. Худо хоҳласа, мухлислар ўйинни телевизорда кўришгач, яна стадионга келишади. Натижага бирор нима дея олмайман. Вақтимиз кам. Бироқ ўйин услубимизни янгилаб, мухлисларга ёқадиган футболни намойиш этиш тарафдоримиз.

- 5 май куни “Қўқон-1912”га қарши водий дербисидек муҳим ўйин кутяпти. Мазкур беллашув олдидан фикрингиз қандай?

- “Қўқон-1912” олдинги йили 5-ўринни олган. Ҳозир ҳам юқори ўринлардан бирида. Бу бежизга эмас. Тўғриси, қўқонликларнинг ўйинларини таҳлил қилиб ўтирибман. “Металлург”, “Машъал” сингари жамоалар билан ўтказган учрашувларини кўряпман. Барча позицияга яхши ўйинчиларни жамлашган. Захирадаги ўйинчилари ҳам яхши. “Қўқон-1912” билан учрашув дербилиги аниқ, буни билиб турибман. Бу беллашув осон кечмаслигини ҳам сезиб турибман. Рақибнинг камчилигини топиб, ўз уйимизда ғалаба қозониш ҳақида бош қотиряпмиз. Бизни бошқа натижа қониқтирмайди.

- Жамоадаги мураббий ўзгаришини футболчилар қандай қабул қилдилар?

- Отабек кетганига албатта кўпчилик футболчилар хафа бўлишди. Чунки аксарияти унинг ортидан келишган. Лекин яхши томони шуки, мен клубда қолдим ва бунгача ҳам мураббийлар штабида биргаликда ишлаб келаётгандик. Футболчиларни яхши биламан. Албатта, ўйинчилар билан бирма-бир гаплашиб чиқамиз. Ҳаёт давом этаётгани ва уларнинг фаолиятида ҳали бундай вазиятлар кўп бўлишини тушунтириб, руҳлантиришга ҳаракат қиламиз.

- Суперлигада бош мураббий сифатида дебютингизни ўтказасиз. Демак, ўзингизни кўрсатиш учун ҳам имконият пайдо бўлмоқда.

- Менга имконият берилди. Бор маҳоратим, меҳрим ва кучимни бериб, натижа кўрсатишга ҳаракат қиламиз. Бунинг устида ишлаяпмиз.