Farruh Ikromov Rimda operatsiya qilinadi

Xabaringiz bor, O‘zbekiston terma jamoasining Shvetsiyaga qarshi o‘rtoqlik uchrashuvida futbolchimiz Farruh Ikromov jarohat olib, maydonni tark etgandi. Tekshiruvlar natijasida ushbu jarohat jiddiyroq ekani va jarrohlik amaliyoti talab etilishi ma’lum bo‘ldi.

Bugun O‘zbekiston futbol assotsiatsiyasi vitse-prezidenti Ravshan Ermatov va O‘zbekiston milliy terma jamoasi bosh murabbiyi Srechko Katanets Farruh Ikromovning xonadonida bo‘lib, futbolchimizning salomatligi va ahvolidan xabar olishdi.

O‘FA tomonidan futbolchimizning tezroq sog‘ayib, safga qo‘shilishi uchun barcha sharoitlar yaratib berilishi ma’lum qilindi. Shu o‘rinda ta’kidlash kerak, O‘zbekiston futbol assotsiatsiyasi Farruh Ikromovni davolashga Italiyaning mashhur jarrohlaridan biri Paolo Marianini jalb etdi.

23-sentyabr kuni futbolchimiz Italiya poytaxti Rimga, “Villa Stuart” klinikasiga yo‘l oladi va u erda professor Mariani tomonidan operatsiya qilinadi.