Фаустино Оро тарихдаги энг ёш иккинчи гроссмейстерга айланди, икки шахматчимиз топ-10'да

Аргентиналик ёш шахматчи Фаустино Оро гроссмейстерлик учун зарур бўлган сўнгги нормани бажарди ва тарихдаги энг ёш иккинчи гроссмейстер сифатида қайд этилди.

У 12 ёш, 6 ой ва 26 кунлигида гроссмейстер унвонини қўлга киритиб, бу кўрсаткич бўйича фақат Мишра Абҳиманьюдан ортда қолди. Америкалик шахматчи 2021 йилда 12 ёш, 4 ой ва 25 кунлигида жаҳон рекордини ўрнатган эди.

Шу тариқа, Фаустино Оро Сергей Карякиннинг 2003 йилдан буён сақланиб келган натижасини янгилади ва шахмат тарихидаги энг ёш гроссмейстерлар рўйхатида иккинчи ўринга кўтарилди.

Эътиборлиси, ушбу нуфузли рўйхатдан икки нафар ўзбекистонлик шахматчи ҳам ўрин олган. Жавоҳир Синдаров 12 ёш, 10 ой ва 5 кунлигида гроссмейстерга айланган бўлса, Нодирбек Абдусатторов эса 13 ёш, 1 ой ва 11 кунлигида ушбу унвонни қўлга киритган.