Файзуллаев ассист қилган ўйиндан сўнг "Башакшеҳир" мураббийи ғалабани юқори баҳолади

Туркия Суперлигасининг 25-турида “Башакшеҳир” ўз майдонида “Гёзтепе”ни 2:1 ҳисобида мағлуб этди. Ушбу баҳсдан сўнг ўтказилган матбуот анжуманида бош мураббий Нури Шaxин ўз фикрлари билан ўртоқлашди.

“Бу биз учун жуда-жуда муҳим ва қимматли ғалаба. Биз тўғридан-тўғри рақибимизга қарши ўйнадик. Ўйин олдидан беллашув ритмини белгилаш кераклигини айтгандим. Дастлабки 15–20 дақиқа, ҳатто гол урганимизга қадар ўйин ритмини биз назорат қилдик. Аммо шундан кейин ўйин “Гёзтепе” хоҳлаган услубга ўтиб кетди. Улар бу ўйинни бошқалардан яхшироқ бажара оладиган жамоа. Афсуски, биз ҳам уларнинг ўйинига мослашиб кетдик.

Шунга қарамай, иккинчи бўлимда амалга оширган ўзгаришларимиз ва жамоанинг сифати туфайли ажойиб гол уриб, ғалаба қозонишни уддаладик. Бундай ўйинларда ғалаба қозониш жуда муҳим. Айниқса, ўйинга кейин қўшилган барча футболчиларим — Ҳамза, Онур, Эргун, Иван Брнич, Мигел Креспо ва Казим жуда яхши ҳаракат қилишди. Уларга алоҳида миннатдорчилик билдирмоқчиман.

Олдимизда ҳали узоқ йўл бор. Яна 9 та тур қолган. Аммо бугун катта ва муҳим қадам ташлаганимизга ишонаман."

Жамоанинг турнир жадвалида 5-ўринга кўтарилгани ҳақида:

“Фақат “Гёзтепе” эмас, олдимизда яна 9 та ўйин бор. Агар бугун мағлуб бўлганимизда, очколар фарқи 6 тага чиқиб кетарди. Шунинг учун бу ғалаба жуда қимматли. Тўғри йўналишда кетаётганимизга ишонаман. Бундай ўйинларда ғалаба қозонишни билиш ҳам жуда муҳим. Чемпионат барча жамоалар учун қандай давом этаётган бўлса, биз учун ҳам шундай давом этмоқда.

Биласизлар, икки ўйин натижаси ҳам ҳисобга олинади. Сафарда “Гёзтепе”га ютқазгандик, бугун эса ғалаба қозондик. Бу каби натижалар чемпионатнинг сўнгги турларида жуда аҳамиятли бўлади. Шунинг учун бу ўйинни лиганинг муҳим ғалабаларидан бири деб айтиш мумкин.

Оперининг ўйин олдидан бироз жароҳати бор эди. Аммо у жамоа билан бирга майдонда бўлишни истади. Казим эса сўнгги 3–4 кундан бери касал бўлгани учун уни асосий таркибда бошлай олмадик. Айрим кутилмаган ҳолатлар ҳам юз берди. Бироз таваккал қилиб, ҳам Казимни, ҳам Оперини майдонга туширишга тўғри келди.

Лекин таркибимизда кўп футболчилар бор. Казим ўйнамаса ҳам, умид қиламанки, Опери тайёр бўлади. Агар у ҳам ўйнай олмаса, Фести, Онур ва Ўмер Али бор. Сўнгги ҳафталарда кўрганингиздек, Фести ҳам жамоага аста-секин кўпроқ мослашмоқда. Шунинг учун катта муаммо бўлади деб ўйламайман”, — деди мураббий.

“Галатасарай билан ўйин ҳақида:

“Клубдаги барча ходимлар: "Келаси ҳафта жуда муҳим ўйинимиз бор", деб айтишяпти. Мен катта клубларда ўйнаганман, лекин “Башакшеҳир”даги босимни ҳеч қаерда ҳис қилмаганман. Ҳозирча “Галатасарай” билан ўйин ҳақида ўйламаяпман.

Албатта, келаси ҳафта сифатли ва катта жамоага қарши майдонга тушамиз. Лекин бугунги ўйиндан бутунлай бошқача беллашув бўлади. Ҳозир эса икки кун дам олиб, бу ғалабадан завқланмоқчиман."