Файзуллаев билан бирга ўйнаган машхур футболчи фаолиятини якунлади

“Барселона”, “Ювентус” ва ЦСКА клубларининг собиқ ярим ҳимоячиси Миралем Пьянич футболчилик фаолиятини расман якунлаганини маълум қилди.

"Мен эндӣ ўйнамайман. Фаолиятимни якунладим. Ҳозир Дубайда яшаяпман ва эндиликда футболчи эмасман. Мен кичик ўғлимнинг отасиман ва у мен учун энг устувор аҳамиятга эга",— дея Пьяничнинг сўзларини журналист Николо Скира келтирди.

35 ёшли босниялик футболчининг профессионал фаолиятидаги сўнгги клуби Москванинг ЦСКА жамоаси бўлган. У клубни ёзги трансфер ойнасидан тарк этган. Аввалроқ у Дубайда футбол агентлиги йўналишида таҳсил олаётгани ҳақида хабарлар тарқалган эди.

Фаолияти давомида Миралем  “Метц”, “Лион”, “Рома”, “Ювентус”, “Барселона”, “Бешиктош”, “Ал-Шаржа” ҳамда ЦСКА клублари шарафини ҳимоя қилган. Шунингдек, у Босния ва Герсеговина миллий терма жамоаси сафида 115 та учрашувда майдонга тушган. Бу кўрсаткич бўйича Пяничдан фақат Эдин Жеко (146 ўйин) олдинда.