Файзуллаев нега яхши ўйнолмаяпти?

Сербиялик бош мураббий Марко Николич қўл остида ЦСКА Россия Премьер-лигасининг жорий мавсумида совринли ўринлар учун даъвогарлик қила бошлади.

2025 йил ҳисобидан “армиячилар” чемпионатнинг энг барқарор жамоаси бўлиб турибди. Чемпионатнинг иккинчи қисмини “Зенит” майдонидаги дуранг билан бошлаган ЦСКА кетма-кет бешта баҳсни ўз фойдасига ҳал қилди ва сўнгги учрашувда “Крилья Советов” билан дуранг ўйнади.

Қишки танаффус вақтида Марко Николич жамоа ўйин схемасини ўзгартирди. Янги усул жамоага натижа келтирди. Бироқ ЦСКАнинг кейинги икки мавсумдаги энг ёрқин футболчиси Аббосбек Файзуллаевнинг ўйинига салбий таъсир ўтказди.

21 ёшли легионеримиз қанот ҳужумчиси амплуасидан майдон марказига ўтказилди. Энди Аббос ҳам ҳужумкор футболчи, ҳам ҳимоячи вазифасини бажаришига тўғри келмоқда. Аксарият экспертлар ҳали ўзбек легионери янги позицияга мослаша олмаганини таъкидлаяпти.

ЦСКА собиқ мураббийи Олег Фоменко журналистлар билан суҳбатда Аббосбек Файзуллаевнинг ўйинидаги пасайиш сабабларини тушунтириб берди.

Sports.uz портали ушбу интервьюни ўзбекистонлик футбол ишқибозлари эътиборига ҳавола этади.

- Нега Аббосбек Файзуллаев илгаридек ёрқин ўйнай олмаяпти? Янги ўйин схемаси унга тўғри келмадими?

- Бу масалада энг аввало Аббоснинг ўзи билан гаплашиш керак. Бироқ, ўйлашимча, ҳамма нарса ҳам бу схемага боғлиқ эмас.

 - Унда гап нимада?

- Беқарорлик ёшликка хос хусусият. Бу мавсум давомида  Аббос жуда катта юклама остида қолиб кетди. Ўзбекистон терма жамоалари сафида Олимпия ўйинлари ва жаҳон чемпионатлари саралашида қатнашди.

Ўйинларга учиш, турли сафарлар изсиз кетмайди, албатта.

Мен янгича усул ва жойлашув Файзуллаевга муаммо туғдиради, деб ўйламайман. У жуда ақлли йигит ва тартиб-интизомли ҳам.

Аббос юкламаларни ҳазм қилиши учун шунчаки бироз вақт керак бўляпти. Қолаверса, кейинги пайтда ҳордиқ чиқариши учун имкон ҳам бўлгани йўқ. Бу оғир.

Уни Ўзбекистон ёшлар ва миллий терма жамоаларига чақиришди. Миллий терма жамоадаги ўйинлари туфайли Россия Премьер-лигасининг айрим турларини ўтказиб юборди.

Олимпия ўйинларида қатнашиш эса, жуда жиддий руҳий таъсир ўтказади. Ҳатто, Европа Чемпионлар лигаси учрашувларидан кейин қудратли жамоалар ҳам миллий чемпионатнинг оддий баҳсларида қийналиб қолишини ҳам кўп кўрганмиз. Мана энди ана шу эмоциялар кетди.

Эслатиб ўтамиз, Аббосбек Файзуллаев жорий мавсум Россия Премьер-лигаси ва мамлакат кубоги доирасида 32 та учрашувда иштирок этиб, рақиблар дарвозасини уч бор ишғол қилди ва жамоадошларига еттита голли пас узатди.

Шомуродов “Интер”га зиён келтирган!

ЦСКА Файзуллаевга нарх белгилади! Трансфер яқинми?

Шомуродов Довбикни “синдирди”!

Файзуллаев “йўқолиб” қолди!

Шомуродов бир гол билан “Рома”нинг мавсум рекордини ўрнатди. Навбат тарихий рекордга!