Файзуллаев нуфузли соврин билан тақдирланди
Москва шаҳрида “Winline Россия Премьер-лигаси қаҳрамонлари”, деб номланган турли йўналишлар бўйича танловлар ғолибларини тақдирлаш маросими бўлди.
ЦСКА ҳужумкор футболчиси Аббосбек Файзуллаев “Мавсус кашфиёти” номинацияси бўйича ғолиб, деб эътироф этилди ва махсус соврин билан тақдирланди.
“Мавсум кашфиёти” номинациясининг якуний босқичида уч нафар футболчининг номи кўрсатилган эди.
20 ёшли легионеримиз “Динамо Москва” легионери Бителло ва “Крилья Советов” футболчиси Никита Сатиковни ортда қолдирди.
Бразилиялик Бителло якунланган мавсумда пойтахт клуби сафида 23та учрашувда иштирок этиб, саккизта гол ва иккита голли пас муаллифи бўлди.
“Крилья Советов” ҳужумчиси Никита Салтиков чемпионатда 29 маротаба майдонга тушиб, рақиблар дарвозасини тўрт маротаба ишғол қилди ва жамоадошларига тўртта голли пас узатди.
Номинация ғолиби бўлган Аббосбек Файзуллаев қисқа фурсатда ЦСКА етакчисига айланди. “Армиячилар” ҳужумини ташкил этишда жонбозлик кўрсатган легионеримиз Россия Премьер-лигасида 22 та учрашувда тўртта тўп киритиб, жамоадошларининг 11 та голига ҳаммуаллиф бўлди.
Аббосбек Файзуллаев “Пахтакор” тарбияланувчиси ҳисобланади. ЦСКА истеъдодли ҳужумкор футболчини ўтган йилнинг августида трансфер қилган эди.
Москваликларнинг бу трансфери 500 минг еврога тушган. Аббосбек Файзуллаев дебют мавсумидаёқ ўзини кўрсатгани унинг трансфер нархига ижобий таъсир кўрсатди.
Трансферларга ихтисослашган transfermarkt.world портали бугунги кунда ўзбек футболчисини беш миллион еврога баҳоланмоқда.
Аббосбек Файзуллаев Европанинг топ-чемпионатлари вакиллари эътиборини қозонгани ҳақида маълумотлар тарқатилмоқда. Бир неча манбаларда келтирилишича, ҳамюртимизни Германиянинг “Бавария”, Италиянинг “Парма” каби таниқли клублари кузатиб бормоқда.
Фикрлар