Энди бу жамоани Файзуллаевсиз тасаввур қилиб бўлмайди!
Аббосбек Файзуллаев учун легионер сифатидаги илк мавсум муваффақиятли ўтди. Ўтган йилнинг августида “Пахтакор”дан ЦСКАга трансфер қилинган 20 ёшли футболчимиз қисқа фурсатда “армиячилар”нинг етакчи ўйинчига айланди.
Россия Премьер-лигаси якунланиб, футбол экспертлари, мураббийлар, мутахассислар мавсум қаҳрамонлари ҳақида ўз фикр-мулоҳазаларини билдирмоқда.
Sports.uz портали россиялик экспертларнинг Аббосбек Файзуллаев ҳақидаги фикрларини ўзбекистонлик футбол ишқибозлари эътиборига ҳавола қилишда давом этади.
Максим Деменко, собиқ футболчи:
“Динамо” чемпион бўла олмаганига қарамай, Марцел Личкани Россия Премьер-лигасида мавсумнинг энг яхши мураббийи, деб ҳисоблайман. Мен учун мавсум кашфиёти Константик Тюкавин бўлди.
Энг яхши ёш футболчи сифатида Аббосбек Файзуллаевни тан оламан. ЦСКА жуда зўр трансферни амалга оширди ва бу ўйинчи ёш бўлишига қарамай, ўзини жамоа етакчиси сифатида кўрсатмоқда.
Энди бундан буёғига ЦСКАни Аббосбек Файзуллаевсиз тасаввур қилиб бўлмайди. У жамоа ўйинини бошқаряпти, ўйиндан ўйинга ўсаётгани кўриниб турибди.
Александр Тарханов, футбол мутахассиси:
Россия Премьер-лигасининг айни пайтда энг яхши мураббийи Марцел Личка. Унинг мураббийлик ғоялари шундоқ кўриниб турибди. “Динамо”ни ёзда қабул қилиб олиб, биринчи мавсумдаёқ чемпионлик даъвогарига айлантирди.
Энг яхши ўйинчи Константин Тюкавин. Яна бир неча маҳоратли ва иқтидорли футболчилар ўзини кўрсата олди. Уларнинг орасида энг сифатли ёш ўйинчи Аббосбек Файзуллаев бўлди.
Таъкидлаш лозимки, Аббосбек Файзуллаев ЦСКА футболчиси сифатида барча турнирларда 31 та ўйинда қатнашиб, бешта гол ва 13 та ассист муаллифи бўлди. Унинг трансфер суммаси 5 миллион еврони ташкил қилмоқда.
Фикрлар