Файзуллаев ва Шомуродов гол урган баҳсда кейин "Башакшеҳир" мураббийи нималар деди?

Туркия Суперлигасининг 17-турида “Истанбул Башакшеҳир” ўз майдонида “Газиантеп” жамоасини 5:1 ҳисобида мағлуб этди. Учрашувдан сўнг мезбонлар бош мураббийи Нури Шаҳин ўз фикрлари билан ўртоқлашди. 

"Аввало жамоам билан фахрланаман. Оғир кунларни бошдан кечирдик, жуда кўп меҳнат қилдик. Ҳисоб ҳеч кимни чалғитмасин — ўйин осон бўлмади. Айниқса, биринчи бўлимда “Газиантеп” бизга жиддий босим ўтказди. Шунга қарамай, футболчиларим яхши ўйин намойиш этиб, охиригача курашди. Натижада ажойиб ғалабага эришдик. Қисқа муддатли мақсадимизга етдик, бироқ чемпионатнинг иккинчи ярми ҳали олдинда. Иккинчи даврани биринчисидан ҳам яхшироқ ўтказишни истаймиз", — деди Шаҳин.

Маълумот учун, мазкур учрашувда асосий таркибда майдонга тушган Ўзбекистон терма жамоаси аъзолари Аббосбек Файзуллаев ва Элдор Шомуродов ўз ҳисобига гол ёздириб қўйди.