Файзуллаевга Германиядан жиддий рақобатчи келди

Туркия Суперлигасида юқори ўринлар учун курашишни мақсад қилган “Истанбул Башакшеҳир” жамоаси таркибини кучайтириб боришга ҳаракат қилмоқда.

Турк клуби Бундеслиганинг “Вольфсбург” клубида ўйнаган Дания миллий терма жамоаси қанот ҳужумчиси Андреас Сков Ольсен билан шартнома тузганини эълон қилди.

- Клубимиз Германиянинг “Вольфсбург” жамоаси футболчиси Андреас Сков Ольсенни 2026/2027 йилги мавсум охиригача ижара асосида, кейинчалик мажбурий сотиб олиш шарти билан ўз сафига қўшиб олди. Дания миллий терма жамоаси аъзоси бўлган Андреас Сков Ольсенни оиламизга хуш келибсиз деймиз ва унга жамоамиз либосидаги фаолиятида  омад тилаймиз, - дейилади “Истанбул Башакшеҳир” клубининг расмий баёнотида.

Ольсен Даниянинг “Нордшелланд” клуби тарбияланувчиси ҳисобланади. 26 ёшли футболчи 2019 йилдан бери легионер мақомида тўп суриб келмоқда. У дастлаб Италиянинг “Болонья” клубида уч ярим йил ўйнади.

Кейин Бельгиянинг “Брюгге” клубига ўтди. “Вольфсбург” Ольсенни 2025 йил январь ойида “Брюгге”дан 14 миллион евро эвазига сотиб олган эди. Ўтган мавсумнинг иккинчи ярмини моҳир футболчи Шотландиянинг “Рейнжерс” жамоасига ижарага жўнатилди.

Шу тариқа, 2025/2026 йилги мавсумда Ольсен Германия Бундеслигасида 8 та, Шотландия чемпионатида эса 9 та учрашувда майдонга тушиб, ҳар икки мусобақада биттадан гол урди.

26 ёшли футболчи Дания миллий терма жамоаси сафида 40 та ўйинда қатнашиб, 8 та гол муаллифи бўлган.

Таъкидлаш жоизки, Андреас Ольсеннинг майдондаги асосий позицияси ўнг қанот ҳужумчисидир. “Истанбул Башакшеҳир”да бир йилдан бери ўйнаётган Аббосбек Файзуллаев ҳам айнан мана шу позиция ўйинчиси ҳисобланади.

Демак, янги мавсумда Аббосбекни янги рақобат кутмоқда. Ольсен қанот ҳужумчиси вазифасидан ташқари ўнг тараф ярим ҳимоячиси ўрнида ҳам ўйнай олади. Бу борада Аббосбек Файзуллаевнинг имкониятлари кенгроқ. Ўзбекистонлик футболчи ўнг қанотдан ташқари чап томонда,  ҳужумчи ортида ва плеймейкер вазифасида ҳам ишончли ўйин намойиш қила олади.

Эслатиб ўтамиз, Аббосбек Файзуллаев Россиянинг ЦСКА клубидан “Истанбул Башакшеҳир”га кўчиб ўтганидан кейин турк жамоаси сафида барча турнирларда 28 та учрашувда иштирок этиб, тўртта гол ва еттита ассист муаллифи бўлди.

Премьер-лига! Ўрозовнинг трансфери ҳал бўлди

Шомуродовни машҳур клубда кўришмоқчи! Элдор ҳар қандай жамоани кучайтиради