Фазлиддин Ғоибназаровнинг принципиал рақиби фаолиятини якунлади ва сиёсат оламига қадам қўйди

Россиялик боксчи Виталий Дунайцев спортдаги фаолиятини якунлаганини ва сиёсатга эътибор қаратиш тўғрисида қарор қабул қилганини маълум қилди.

"Барчаси якунланди. Мен Белгород вилояти бокс федерациясининг раҳбариман ва депутатлар кенгаши аъзосиман. Шунингдек, "Ягона Россия"нинг ёш гвардияси минтақавий бўлимини бошқараман. Асосий эътиборимни ушбу фаолиятимга қаратмоқчиман. Шунинг учун, спортга қайтмайман", - деди Дунайцев.

Виталий 2016 йилда Рио-де-Жанейрода бўлиб ўтган Олимпия ўйинларида 64 кг вазн тоифасида бронза медалига сазовор бўлган. Шунингдек, у 2015 йилда жаҳон ва Европа чемпионатида ғолиб бўлганди.

Маълумот учун, ҳамюртимиз Рио Олимпиадаси чемпиони Фазлиддин Ғоибназаров 2015 йилги жаҳон чемпионати финалида ушбу боксчига имкониятни бой берган бўлса, 2016 йил Рио Олимпиадаси ярим финалида ундан устун келган эди.

Манба: ТАСС