"Фенербаҳче" ҳужумчи учун ҳаракатни бошлади. Рўйхатда ўзбекистонлик футболчининг номи ҳам бор

"Фенербаxче"да трансфер ишлари жадал суръатда давом этмоқда. "Сариқ-лочинлар" раҳбарияти ҳужум чизиғини кучайтириш учун жиддий ҳаракатни бошлади ва рўйхатга бир-биридан муҳим 4 нафар футболчини киритди. Бу ҳақда турк ОАВ хабар берди.

Манбага кўра, форвардлар ўртасида рақобатни ошириш ҳамда чемпионлик йўлида хатога йўл қўймасликни истаган клуб қуйидаги номзодлар билан шартнома имзолаши мумкин:

Вот Вегхорст — Суперлигни яхши биладиган, иродаси ва прессинги билан танилган нидерландиялик ҳужумчи яна Туркияга қайтиши кутилмоқда.

Кшиштоф Пёнтек — "Башакшеҳир"даги ўйини орқали яна қайта тикланган ва "Гол машинаси" лақабига муносиб бўлган польшалик юлдуз рўйхатнинг юқори ўринларидан жой олган.

Дениз Гюл — "Порту" сафида тўп сураётган ёш иқтидор. Маҳаллий мақомга эга экани ва салоҳияти билан келажак учун ажойиб инвестиция бўлиши мумкин.

Элдор Шомуродов — жисмоний кучи ва ҳаводаги устунлиги билан ажралиб турадиган ўзбекистонлик форвард ҳам вариантлар орасида.